Një tjetër sulm me armë zjarri ka goditur një shkollë në jug të Turqi, duke lënë pas një bilanc tragjik prej nëntë viktimash, vetëm një ditë pas një incidenti të ngjashëm që tronditi vendin.
Sipas autoriteteve, të paktën tetë nxënës dhe një mësues humbën jetën pas të shtënave në shkollën e mesme “Ayser Calik” në zonën e Kahramanmaras. Ministri i Brendshëm Mustafa Cifci konfirmoi gjithashtu se 13 persona u plagosën, ndërsa gjashtë prej tyre ndodhen në gjendje kritike.
Sulmi u përmbyll me vdekjen e autorit, një 14-vjeçar, sipas zyrtarëve.
Ngjarja vjen në një klimë të tensionuar, pasi vetëm një ditë më parë, një tjetër sulm me armë zjarri në një shkollë të mesme në jug të vendit la 16 persona të plagosur, përpara se autori – një ish-nxënës – t’i jepte fund jetës.
Sipas mediave turke, autori i sulmit të fundit, që besohet të jetë student, kishte hyrë në dy klasa i armatosur rëndë, duke mbajtur me vete pesë armë dhe shtatë karikatorë. Guvernatori lokal Mukerren Unluer deklaroi se armët i përkisnin babait të tij, një ish-oficer policie, i cili tashmë është ndaluar nga autoritetet.
Pamjet e verifikuara tregojnë momentet e panikut: nxënës që hidhen nga dritaret e katit të parë për të shpëtuar dhe turma që largohen me vrap nga ambientet e shkollës. Një gazetar për televizionin NTV përshkroi situatën si kaotike, duke theksuar se “zhurma e të shtënave ishte shumë intensive” dhe se jashtë shkollës mbizotëronte paniku.
Ambulanca dhe forca të shumta policie u vendosën menjëherë në vendngjarje, ndërsa prindër të dëshpëruar u mblodhën jashtë shkollës në kërkim të fëmijëve të tyre. “Fëmija im e pa skenën dhe më tha: ‘Babi, shoku im u lëndua’,” rrëfeu një prind, Omer Erdag, për AFP, duke shprehur më tej frikën dhe pasigurinë: “Si do t’i sjell përsëri fëmijët e mi në këtë shkollë?”
Presidenti Recep Tayyip Erdogan reagoi përmes një postimi në rrjetin X, duke shprehur ngushëllimet për familjet e viktimave dhe duke uruar shërim të shpejtë për të plagosurit.
Dy sulme brenda 48 orëve kanë ngritur alarmin për sigurinë në shkollat turke, ndërsa vendi përballet me një nga momentet më të rënda të dhunës në ambiente arsimore.
(Burimi: BBC)
