Pamjet të lënë pa frymë.
Sportisti estonez Jaan Roose realizoi një nga sfidat më të rrezikshme dhe spektakolare të karrierës së tij, duke ecur mbi një litar të tendosur mes dy ndërtesave më të larta të Polonisë, qindra metra mbi tokë.
Ngjarja u zhvillua në kryeqytetin polak, Warsaw, në kuadër të aktivitetit “Red Bull Time Line”, ku Roose kaloi me sukses distancën që lidh dy simbolet më të njohura të horizontit modern të qytetit: Palace of Culture and Science dhe Varso Tower.
Litari ishte vendosur në një lartësi marramendëse, mbi 230 metra nga toka, ndërsa mijëra qytetarë dhe turistë ndoqën me ankth dhe admirim lëvizjet e sportistit estonez.
Roose, i konsideruar si një nga mjeshtrit më të mëdhenj në botë të disiplinës së “slackline”, ecjes mbi litar në lartësi ekstreme, lëvizi me qetësi të jashtëzakonshme përgjatë kabllit të ngushtë, duke sfiduar jo vetëm gravitetin, por edhe erën dhe presionin psikologjik të një gabimi të vetëm.
Pamjet e publikuara nga organizatorët tregojnë sportistin pezull mes qiellgërvishtësve, me panoramën e Varshavës poshtë këmbëve të tij, duke krijuar një spektakël që shumë e krahasuan me skena filmash aksion.
Kjo nuk është hera e parë që estonezi mahnit botën me sfida të tilla.
Në vitin 2024 ai bëri histori duke u bërë personi i parë që kaloi në këmbë ngushticën e Mesinas mbi një litar të vendosur mbi det.
Megjithatë, organizatorët e eventit në Varshavë e cilësuan sfidën mes dy ndërtesave si një nga performancat më të vështira urbane të realizuara ndonjëherë në Europë.
Varso Tower, një nga dy ndërtesat e përfshira në sfidë, është aktualisht ndërtesa më e lartë në Bashkimin Europian, me një lartësi që kalon 300 metra.
Ndërsa për shumicën e njerëzve edhe shikimi i pamjeve shkakton marramendje, për Jaan Roose sfida ishte një tjetër demonstrim i kontrollit absolut të trupit, përqendrimit dhe guximit ekstrem.
