Një tjetër zyrtar i lartë i Universitetit Columbia është detyruar të largohet nga posti i tij pas zbulimeve që lidhen me pranimin e diskutueshëm të Karyna Shuliak, partneres së Jeffrey Epstein.
Universiteti Columbia njoftoi se Dr. James Fine, zëvendësdekan i lartë për çështjet akademike dhe studentore pasuniversitare në Kolegjin e Mjekësisë Dentare, do të largohet nga funksioni i tij administrativ. Megjithatë, ai do të vazhdojë të mbetet profesor me mandat të përhershëm dhe drejtor i praktikave klinike të fakultetit.
Vendimi vjen rreth katër muaj pasi universiteti pranoi publikisht se pranimi i Karyna Shuliak kishte pasur “parregullsi”, por pa përmendur atëherë rolin e Dr. Fine në proces.
Sipas hetimeve, Fine jo vetëm që kishte ndihmuar Shuliak gjatë pranimit të saj fillestar në vitin 2012, por në vitin 2023 kishte shkruar edhe një letër rekomandimi për pranimin e saj në një program pasuniversitar që ai vetë mbikëqyrte. Gazeta raportoi gjithashtu se ai e kishte ndihmuar Shuliak në provimin e transferimit më shumë se një dekadë më parë, kur Jeffrey Epstein po përpiqej ta fuste në fakultet.
Historia filloi në vitin 2011, kur Shuliak u refuzua fillimisht nga Kolegji i Mjekësisë Dentare. Pas refuzimit, dentisti Thomas Magnani, mik i afërt i Fine dhe personi që solli Epsteinin në kontakt me universitetin, ndërhyri në favor të saj. Në një komunikim të vitit 2012, Magnani i shkruante Epsteinit se sapo kishte folur me James Fine dhe se ky i fundit do të dinte paraprakisht se çfarë do të përmbante testi që Shuliak duhej të kalonte për transferimin. Më pak se tre muaj pas refuzimit fillestar, ajo u pranua si studente e transferuar dhe u diplomua në vitin 2015.
Pas diplomimit, Fine organizoi për të një praktikë profesionale në klinikën private të Magnanit, e lidhur me Universitetin Columbia, ku punonte edhe vetë. Të dy dentistët kishin ofruar më parë shërbime dentare për Epstein dhe bashkëpunëtorët e tij, duke ruajtur marrëdhënie të gjata personale me financierin e dënuar për trafikim seksual.
Kur Shuliak aplikoi në vitin 2023 për një program pasuniversitar njëvjeçar në stomatologji, Fine dhe Magnani shkruajtёn letra mbështetëse tepër entuziaste. Në letrën e tij, Fine deklaronte:
“Si profesor dhe ish-drejtor programi, unë vetë do ta pranoja në programin tim pa asnjë rezervë apo hezitim. Besoj sinqerisht se pranimi i Dr. Shuliak do të ishte një përfitim i madh si për të, ashtu edhe për institucionin.”
Shuliak përfundoi programin pasuniversitar në vitin 2025.
Universiteti deklaroi se hetimi i brendshëm arriti në përfundimin se Shuliak i plotësonte kriteret akademike për pranimin në programin e vitit 2023. Megjithatë, sipas universitetit, u ngritën “shqetësime të veçanta” për përfshirjen e Fine në proces për shkak të pozicionit të tij të lartë administrativ.
Brenda fakultetit, vendimi për të mos e larguar plotësisht Fine ka shkaktuar pakënaqësi. Disa pedagogë dhe bashkëpunëtorë të kolegjit kanë deklaruar se masat janë të pamjaftueshme, duke argumentuar se Fine dhe një tjetër figurë e përfshirë në çështje, Dr. Letty Moss-Salentijn, vazhdojnë të ushtrojnë ndikim të drejtpërdrejtë mbi studentët dhe stafin akademik.
Në shkurt të këtij viti, Columbia ndërmori masa edhe ndaj Thomas Magnani, duke i hequr rolin në proceset e pranimit, duke ndërprerë lidhjet institucionale me klinikën e tij private dhe duke anuluar emërimin e tij vullnetar në fakultet.
Në prill, presidentja e përkohshme e Universitetit Columbia, Claire Shipman, u pyet publikisht për rolin e James Fine në këtë histori dhe deklaroi se universiteti do të hetonte çdo element të ri që do të dilte në dritë. Rezultati i atij hetimi u publikua këtë javë.
Megjithatë, në përfundim të hetimit, Columbia këmbëngul se nuk ka gjetur prova që pranimi i Shuliak të ketë qenë i paligjshëm ose i papërshtatshëm.
“Një hetim i brendshëm nuk zbuloi një pranim të parregullt,” deklaroi universiteti në qëndrimin e tij zyrtar.
Burimi: Columbia Daily Spectator
