Burime të sigurta konfirmojnë se emri i Ervina Gjanës është në fokus të një linje të re hetimore që lidhet me dyshime për bashkëpunim me krimin e organizuar, konkretisht në funksion të mbrojtjes së aktiviteteve të paligjshme të call center-ave.
Ervina Gjane mban një post kyç në strukturat e rendit, si Drejtoreshë e Krimit Kibernetik dhe Kompjuterik në Drejtorinë e Përgjithshme të Policisë së Shtetit, një funksion me përgjegjësi të drejtpërdrejtë në hetimin dhe parandalimin e veprave penale që lidhen me mashtrimet online, call center-at, ndërhyrjet në sistemet informatike dhe bashkëpunimin ndërkombëtar për krimin kibernetik, çka e bën rolin e saj veçanërisht të ndjeshëm dhe me peshë të lartë institucionale në çdo proces hetimor të kësaj natyre.
Sipas burimeve, janë kryer kontrolle banesash dhe po analizohen komunikime dhe dokumente që lidhen me bllokimin ose vonesën e qëllimshme të leterporosive, të cilat dyshohet se kanë penguar hetime ndërkombëtare dhe procedura ligjore ndaj këtyre strukturave kriminale.
Hetimi dyshohet se synon të zbulojë nëse ka pasur një zinxhir funksionarësh dhe ndërmjetësish, të cilët kanë vepruar në mënyrë të koordinuar për të garantuar “qetësinë” e call center-ave, përmes ndërhyrjeve në sistemin ligjor dhe policor.
Me shumë gjasa edhe kjo dosje lidhet me zhvillimet e fundit në nivele të larta të Policisë së Shtetit, përfshirë sekuestrimin e telefonit të Ilir Prodës dhe pezullimin nga detyra të nëndrejtorit të Policisë Erion Ismailaj.
Megjithëse autoritetet nuk kanë dalë ende me një njoftim zyrtar të detajuar, burimet theksojnë se hetimet janë në fazë aktive dhe pritet të sjellin zhvillime të rëndësishme, përfshirë përgjegjësi penale për persona me funksione kyçe.
SPAK dhe BKH nuk kanë komentuar zyrtarisht mbi këto informacione, ndërsa burimet insistojnë se bëhet fjalë për një dosje të ndarë, por të ndërthurur me çështje të tjera të rënda që kanë në qendër bashkëpunimin e strukturave shtetërore me krimin e organizuar.
