Sipas ministrit italian të Mbrojtjes Guido Crosetto, dokumenti i ri i Presidentit amerikan Donald Trump mbi Sigurinë Strategjike Kombëtare vetëm sa konfirmon atë që ai paralajmëron prej tre vitesh: SHBA po shkëputet nga Evropa, dhe garancitë e mbrojtjes së ofruara që prej vitit 1945 po marrin fund me ritëm shumë më të shpejtë sesa pritej.
Trump e thotë hapur: konkurenti i vërtetë i Amerikës është Kina, dhe në këtë duel epokal Evropa është “e vogël, e ngadaltë, e vjetër dhe pak ose aspak e dobishme” për interesat e Uashingtonit. BE nuk ka burime natyrore, ka humbur avantazhin teknologjik dhe nuk disponon forcë të mjaftueshme ushtarake. Kjo e bën, në sytë e Shtëpisë së Bardhë, një partner dytësor — jo më boshti i aleancës transatlantike.
Crosetto nuk tronditet nga ky verdikt: ai madje e quan të pashmangshëm. Për Italinë dhe Evropën, mesazhi është i qartë: “Duhet të lëvizim. Dhe të rikuperojmë dekada të humbura në mbrojtje.”
Në fillim të vitit 2026, Roma do të paraqesë një projektligj të ri për Mbrojtjen, me rritje fondesh, modernizim të kapaciteteve dhe braktisjen e modelit të vjetër “Di Paola” me 150.000 trupa. Europa, sipas tij, duhet të ndërtojë kapacitete reale parandalimi, sepse më nuk mund të presë “dhurata sigurie” nga Amerika.
Por tabloja nuk është krejt pesimiste: Crosetto vëren se Italia tashmë ka filluar të ndërtojë marrëdhënie dypalëshe strategjike në Afrikë, Gjirin Persik, Azi, Amerikën e Jugut dhe Australi, për të garantuar sigurinë energjetike, ekonomike dhe ushtarake. Europa, thotë ai, mbetet vendi natyral për aleanca të fuqishme — veçanërisht në teknologji, ku “pragu i hyrjes” është kaq i lartë sa asnjë shtet nuk ja del i vetëm.
Për ministrin italian, rruga është e vështirë, por e domosdoshme:
“Sa më shumë jemi, aq më të fortë dhe më pak të kushtueshëm bëhemi. Tani është çështje mbijetese.”
Analiza e Crosetto-s shkon përtej alarmit: është një thirrje për Evropën që të zgjohet nga iluzioni se mund të vazhdojë e paangazhuar në një botë që po ndryshon me shpejtësi dramatike.
(Burimi: ANSA)
