Franca regjistroi rreth 9 mijë vdekje gjatë javës së kulmit të valës ekstreme të të nxehtit në fund të muajit qershor, sipas të dhënave paraprake të Institutit Kombëtar të Statistikave dhe Studimeve Ekonomike (INSEE), të publikuara nga BFMTV.
Sipas raportit, mes 22 dhe 28 qershorit u regjistruan elektronikisht gati 9,000 vdekje në të gjithë vendin, ose 2,025 më shumë krahasuar me periudhën normale, rritje që përkon me kulmin e temperaturave ekstreme që përfshinë Francën.
Ministrja franceze e Shëndetësisë, Stéphanie Rist, theksoi se shifrat janë ende paraprake, pasi certifikatat elektronike të vdekjes nuk përfshijnë të gjitha rastet e regjistruara në nivel kombëtar.
Autoritetet franceze paralajmëruan se të dhënat aktuale duhet të interpretohen me kujdes dhe se numri real i viktimave mund të jetë edhe më i lartë.
Sipas zyrtarëve, certifikatat elektronike mbulojnë rreth 60% të të gjitha vdekjeve në Francë, ndërsa niveli i raportimit ndryshon nga një rajon në tjetrin.
Franca u përball për disa ditë me temperatura jashtëzakonisht të larta, ku në shumë rajone termometri kaloi 35 gradë Celsius, duke ushtruar presion të madh mbi sistemin shëndetësor dhe shërbimet e emergjencës.
