Presioni ndaj ish-kryeministrit spanjoll José Luis Rodríguez Zapatero po rritet, pasi Gjykata e Lartë Penale e Spanjës ka hapur një hetim të ri ndaj tij për dyshime mbi kontrabandë dhe evazion fiskal.
Sipas vendimit të gjyqtarit José Luis Calama, hetimi lidhet me më shumë se 100 bizhuteri luksoze, të vlerësuara mbi 1.3 milionë euro, të cilat u gjetën muajin e kaluar gjatë një kontrolli policor në zyrën private të Zapateros në Madrid.
Gjykatësi argumenton se origjina ligjore e bizhuterive “nuk është justifikuar aktualisht”, ndërsa mungesa e dokumentacionit tatimor për blerjen e tyre përbën “indikacione objektive dhe të arsyeshme për ekzistencën e një mashtrimi të rëndësishëm fiskal”.
Po ashtu, autoritetet po hetojnë mundësinë që sendet me vlerë të kenë hyrë në Bashkimin Evropian duke shmangur kontrollet doganore dhe detyrimet fiskale, çka mund të përbëjë vepër penale të kontrabandës.
Ky është hetimi i dytë i rëndësishëm që përfshin ish-liderin socialist. Në maj të këtij viti, i njëjti gjyqtar hapi një procedim penal historik ndaj Zapateros për rolin e tij të dyshuar në një rrjet ndikimi të paligjshëm dhe pastrimi parash. Çështja lidhet, mes të tjerash, me shpëtimin financiar shumëmilionësh të kompanisë ajrore spanjolle Plus Ultra, e cila dyshohet se kishte lidhje me interesat venezueliane.
Gjatë kontrolleve të kryera në kuadër të atij hetimi, policia bastisi disa ambiente të lidhura me Zapateron, përfshirë edhe zyrën ku u zbuluan bizhuteritë.
Publikimi i fotografive të sendeve luksoze në mediat spanjolle shkaktoi reagime të forta në opinionin publik. Fillimisht, përfaqësues të ish-kryeministrit deklaruan se vlera e tyre ishte vetëm mes 30 mijë dhe 50 mijë eurosh, duke pretenduar se ato vinin nga trashëgimi familjare dhe dhurata.
Megjithatë, pas publikimit të vlerësimeve zyrtare, zëdhënësi i Zapateros, Luis Arroyo, kërkoi falje publikisht duke pranuar se opinioni publik ishte informuar gabimisht për vlerën reale të bizhuterive.
“José Luis Rodríguez Zapatero do të japë shpjegimet e nevojshme para gjykatës”, deklaroi ai.
Akuzat kanë shkaktuar tronditje brenda partisë në pushtet në Spanjë. Kryeministri aktual Pedro Sánchez ka mbrojtur vazhdimisht pafajësinë e paraardhësit të tij politik, i cili konsiderohet gjerësisht si një nga mentorët e tij kryesorë.
Zapatero i ka mohuar të gjitha akuzat dhe pritet të dëshmojë para gjykatës më 17 dhe 18 qershor.
