Gjiganti gjerman i automobilëve Volkswagen ka njoftuar një plan të thellë ristrukturimi, i cili parashikon uljen deri në 50% të numrit të modeleve që prodhon, në përpjekje për të ulur kostot dhe për t’u përballur me konkurrencën gjithnjë e më të fortë të prodhuesve kinezë të automjeteve elektrike.
Vendimi u miratua pas një mbledhjeje të bordit drejtues, ndërsa kompania pranoi në mënyrë të tërthortë se është bërë tepër e madhe dhe komplekse për t’iu përshtatur transformimit global të industrisë së automobilëve nga motorët me lëndë djegëse drejt automjeteve elektrike.
Megjithëse Volkswagen nuk dha detaje se cilat modele do të hiqen nga prodhimi apo çfarë do të ndodhë me fabrikat dhe punonjësit, mediat gjermane raportojnë se kompania po shqyrton shkurtimin e deri 100 mijë vendeve të punës deri në fund të dekadës dhe mbylljen e katër fabrikave në Evropë.
Drejtori ekzekutiv Oliver Blume deklaroi se kompania duhet të “eliminojë kapacitetet e tepërta”, duke lënë të kuptohet se mbyllja e fabrikave mbetet një opsion.
“Situata gjeopolitike është bërë shumë më kritike gjatë 12 muajve të fundit. Vitet e ardhshme do të përcaktojnë se kush do të luajë një rol vendimtar në industrinë automobilistike”, tha Blume.
Volkswagen synon tashmë të prodhojë rreth 9 milionë automjete në vit, shumë më pak se objektivi prej 12 milionësh që kishte para pandemisë.
Kompania zotëron 111 fabrika në të gjithë botën dhe kontrollon marka të njohura si Audi, Porsche, Skoda, Lamborghini, Bentley, si edhe prodhuesin e kamionëve Traton, ku përfshihen MAN, Scania dhe International.
Një nga problemet kryesore është mbivendosja e modeleve mes markave të grupit, çka ka rritur kostot dhe kompleksitetin e prodhimit. Ndryshe nga Volkswagen, prodhues amerikanë si General Motors dhe Ford vite më parë eliminuan marka si Pontiac, Oldsmobile, Saturn dhe Mercury për të thjeshtuar aktivitetin.
Situata është veçanërisht shqetësuese në qytetin gjerman Neckarsulm, ku rreth 15 mijë punonjës prodhojnë modelet Audi. Banorët paralajmërojnë se një mbyllje e mundshme e fabrikës do të kishte pasoja katastrofike për ekonominë lokale.
“Nëse Audi vdes, këtu vdes gjithçka”, tha një punonjëse e qendrës së testimit të fabrikës.
Kompania nuk bëri të ditur sa prej 657 mijë punonjësve në mbarë botën mund të preken nga ristrukturimi, por shifrat financiare tregojnë vështirësitë: fitimi i Volkswagen ra 28% në tremujorin e parë, duke zbritur në 1.6 miliardë euro, ndërsa shitjet ranë me 2%.
Edhe Porsche, një nga markat më fitimprurëse të grupit, është goditur nga tarifat 25% të vendosura nga administrata Trump për automjetet e importuara, pasi të gjitha modelet e saj prodhohen në Gjermani dhe eksportohen në SHBA.
Një tjetër goditje e rëndë ka ardhur nga Kina, tregu që për vite me radhë ishte burimi kryesor i fitimeve të Volkswagen. Në tremujorin e parë të këtij viti, shitjet e kompanisë në Kinë ranë me 20%, duke vazhduar një trend rënës të disa viteve.
Prodhuesit kinezë si BYD dhe Geely po fitojnë terren falë automjeteve elektrike me teknologji moderne dhe çmime më konkurruese. Në muajin maj, për herë të parë, prodhuesit kinezë shitën më shumë automjete në Bashkimin Evropian dhe Britani sesa prodhuesit japonezë.
Ekspertët vlerësojnë se Kina përfitoi nga partneritetet shumëvjeçare me kompanitë perëndimore për të përvetësuar teknologjinë e prodhimit dhe më pas investoi masivisht në automjetet elektrike, duke marrë avantazh të konsiderueshëm në treg.
Kriza e Volkswagen po konsiderohet një sinjal alarmi jo vetëm për industrinë gjermane, por për të gjithë prodhuesit tradicionalë evropianë dhe japonezë, të cilët po përballen me konkurrencën gjithnjë e më agresive të kompanive kineze.
Burimi: NYT
