Biblioteka Kombëtare e Shqipërisë çel për publikun një nga ekspozitat më të veçanta të këtij viti, pjesë e ciklit të prezantimeve që nxjerrin në dritë thesaret e fshehura të fondit kombëtar.
Këtë herë vizitorët do të kenë mundësinë të eksplorojnë “Koleksionin e Biblave”, një udhëtim unik në botën e librave të shenjtë dhe dorëshkrimeve që kanë shënuar shekuj historie, kulture dhe spiritualiteti.
Ekspozita paraqet për herë të parë mbi 100 Bibla të rralla, të shtypura në Itali, Francë, Gjermani, Holandë, Greqi dhe vende të tjera, që datojnë nga mesi i shekullit XV deri në shekullin XIX. Krahas tyre ekspozohen dhe dorëshkrime me pjesë të shkrimeve të shenjta të një rëndësie të veçantë historike.
Në fokus janë gjithashtu përpjekjet e mëdha për përkthimin e Biblës në gjuhën shqipe, nga Gjon Buzuku, Pjetër Budi, Pjetër Bogdani, te rilindasit dhe gjuhëtarët e shquar si Kristoforidhi, Qiriazi, Fan Noli e deri te Dom Simon Filipaj, si dhe kontributi i Shoqërisë Biblike Angleze në shekullin XIX.
Kjo ekspozitë sjell një ndërthurje të rrallë mes historisë, kulturës dhe trashëgimisë sonë të shkruar, duke ofruar një përvojë të paharrueshme për të gjithë vizitorët nga 19 nëntor 2025 – 19 dhjetor 2025.
