Një zhvillim shqetësues është raportuar së fundmi nga mediat opozitare iraniane, sipas të cilave autoritetet në Iran kanë ulur moshën minimale të rekrutimit për role jo-luftarake në vetëm 12 vjeç.
Sipas raportimit, një zyrtar i Gardës Revolucionare Islamike (IRGC), Rahim Nadali, ka deklaruar se iniciativa e quajtur “Për Iranin” po përfshin gjithnjë e më shumë të rinj, përfshirë edhe fëmijë, në përpjekjet mbështetëse të luftës. Ai ka pranuar se kjo lëvizje erdhi pasi vetë të miturit kanë shprehur interes për t’u përfshirë, duke shtyrë autoritetet të ulin kufirin e moshës.
Fëmijët e përfshirë nuk marrin pjesë drejtpërdrejt në luftime, por angazhohen në detyra si patrullime, kontroll pikash, si dhe mbështetje logjistike për strukturat ushtarake.
Megjithatë, kjo praktikë ka ngritur shqetësime serioze në nivel ndërkombëtar. Ekspertët theksojnë se përdorimi i të miturve, edhe në role mbështetëse, bie ndesh me Konventën për të Drejtat e Fëmijëve, e cila ndalon përfshirjen e fëmijëve në aktivitete ushtarake.
Raportet tregojnë gjithashtu se programi mund të jetë pjesë e një nisme më të gjerë të quajtur “Mbrojtësit e Atdheut të Iranit”, duke sinjalizuar një mobilizim më të gjerë të shoqërisë, përfshirë edhe grupmosha shumë të reja.
Ky zhvillim vjen në një moment tensioni të lartë në rajon dhe shihet nga analistët si një tregues i presionit në rritje mbi strukturat shtetërore iraniane për të zgjeruar burimet njerëzore në mbështetje të përpjekjeve ushtarake.
(Burimi: Ynetnews)
