Jordania ka paralajmëruar se një nga vendet më të shenjta për myslimanët, kompleksi i Xhamisë Al-Aksa në Jerusalemin Lindor, përballet me një “rrezik të afërt” për ndryshimin e statusit të tij nga Izraeli. Për këtë arsye, Amani ka thirrur një mbledhje urgjente të ministrave të Jashtëm të vendeve arabe dhe islame, duke paralajmëruar se zhvillimet mund të ndezin një konflikt me pasoja në të gjithë rajonin.
Sipas autoriteteve jordaneze, shqetësimi lidhet me shtimin e hyrjeve të grupeve hebraike ultranacionaliste në kompleksin e Al-Aksas, të shoqëruara nga rituale fetare që, sipas Jordanisë, shkelin marrëveshjen historike që garanton se vetëm myslimanët mund të falen në këtë vend të shenjtë.
Më 23 korrik, mbi 2.000 izraelitë të krahut të djathtë, të udhëhequr nga ministri i Sigurisë Kombëtare, Itamar Ben Gvir, hynë në kompleksin që hebrenjtë e njohin si Mali i Tempullit. Sipas Jordanisë, kjo ishte shkelja më e rëndë e status quo-së në historinë moderne.
Ministri i Jashtëm jordanez, Ayman Safadi, deklaroi se çdo ndryshim i statusit aktual mund të “shkaktojë një konflikt fetar që do të tejkalojë Palestinën dhe Jordaninë dhe do të përfshijë mbarë botën myslimane”.
“Jerusalemi është një fuçi baruti. Po përpiqemi ta paralajmërojmë komunitetin ndërkombëtar për rrezikun e afërt që paraqesin këto masa,” u shpreh Safadi.
Frikë edhe për Bregun Perëndimor
Përveç zhvillimeve në Al-Aksa, Jordania është gjithashtu e shqetësuar për përshkallëzimin e situatës në Bregun Perëndimor, ku frikësohet se mund të ketë përpjekje për dëbimin masiv të palestinezëve drejt territorit jordanez.
Amani e ka cilësuar një skenar të tillë si një “vijë të kuqe”, duke paralajmëruar se një zhvendosje e detyruar e popullsisë palestineze do të përbënte shkelje të së drejtës ndërkombëtare dhe do të destabilizonte Jordaninë, ku më shumë se gjysma e popullsisë është me origjinë palestineze.
Tensionet shtrihen edhe në marrëdhëniet mes dy vendeve
Marrëdhëniet mes Izraelit dhe Jordanisë janë tensionuar edhe për çështje të tjera. Sipas autoriteteve jordaneze, Izraeli ka reduktuar furnizimin me ujë që i dërgon Jordanisë, ndërsa kritikat e Amanit ndaj operacioneve ushtarake izraelite në Gaza kanë rritur më tej përplasjet diplomatike.
Ndërkohë, partitë islamiste dhe një pjesë e opinionit publik në Jordani po kërkojnë një qëndrim edhe më të ashpër ndaj Izraelit, ndërsa mbështetja për normalizimin e marrëdhënieve mes dy vendeve është dobësuar ndjeshëm.
Mbledhja urgjente e thirrur nga Jordania pritet të zhvillohet këtë të mërkurë, me pjesëmarrjen e vendeve të Ligës Arabe, si edhe Turqisë, Indonezisë, Malajzisë dhe Pakistanit, për të diskutuar një përgjigje të përbashkët ndaj zhvillimeve në Jerusalemin Lindor.
