Një operacion i pazakontë për nga përmasat ka tronditur dje Prizrenin. Prokuroria Themelore e këtij rajoni ka vënë në pranga 109 komisionerë zgjedhorë, të dyshuar për falsifikim masiv të rezultateve të votimit në zgjedhjet e fundit parlamentare. Në qendër të hetimit është dyshimi se janë manipuluar rreth 68 mijë vota të kandidatëve për deputetë.
Që në orët e para të mëngjesit, 121 komisionerë dhe persona të tjerë të përfshirë në procesin zgjedhor u thirrën për intervistim në disa stacione policore. Pas më shumë se gjashtë orësh marrjesh në pyetje, 109 prej tyre u ndaluan zyrtarisht dhe u dërguan në paraburgim për 48 orë, ndërsa 12 persona u liruan.
Kryeprokurori i Prizrenit, Petrit Kryeziu, konfirmoi se hetimi ka zbuluar një skemë të organizuar manipulimi, e realizuar në Qendrën Komunale të Numërimit, madje edhe në prani të kamerave dhe vëzhguesve. Ai deklaroi se në disa qendra votimi janë konstatuar ndërhyrje masive në rezultate, me raste ku mbi 2,000 vota janë ndryshuar vetëm në një pikё numёrimi.
Sipas Kryeziut, të ndaluarit dyshohen jo vetëm për “Falsifikim të rezultateve të votimit”, por edhe për “Kanosje” dhe “Dhënie ose marrje ryshfeti në lidhje me votimin”. Gjatë intervistimeve, disa prej komisionerëve kanë dhënë dëshmi mbi presionet e ushtruara dhe personat nga të cilët kanë marrë para. Mes të arrestuarve ka edhe familjarë të kandidatëve për deputetë dhe zyrtarë partiakë lokalë.
Hetimi ka zbuluar gjithashtu se ky manipulim nuk mund të ishte kryer pa një marrëveshje të gjerë politike. “Po të mos kishte dakordim, nuk do të kishte manipulim”, u shpreh Kryeziu, duke lënë të kuptohet se skema përfshin më shumë se individë të veçuar.
Mes të arrestuarve është edhe Art Hasani, djali i kandidatit për deputet nga PDK, Nait Hasani. Avokati i tij konfirmoi se ai ka qenë komisioner dhe po hetohet për falsifikim të rezultateve. Ndërkohë, disa avokatë të komisionerëve të tjerë deklaruan se klientët e tyre pretendojnë se kanë nënshkruar procesverbalet pa pasur dijeni për manipulimet.
Operacioni u realizua nga katër prokurorë të krimeve të rënda dhe rreth 200 efektivë policie, duke u cilësuar si një nga aksionet më të mëdha kundër krimeve zgjedhore të ndërmarra ndonjëherë në Kosovë.
Pavarësisht tronditjes fillestare dhe trishtimit që sjell fakti se edhe në Kosovë procesi zgjedhor mund të cenohet, reagimi i Prokurorisë së Prizrenit është shembullor. Një fakt që ndan fort jo kufirin, por mentalitetin demokratik Shqipëri–Kosovë: Për falsifikim të rezultateve zgjedhore në Kosovë arrestohesh në vend. Po në Shqipëri?
