Partia Demokratike po përjeton një tjetër episod përplasjeje të brendshme, në një moment kur opozita shqiptare po përballet me sfidën më të madhe: mungesën e besimit publik. Ndërsa qytetarët kërkojnë alternativa reale politike, brenda selisë blu beteja mbetet e njëjtë – kush kontrollon partinë.
Ish-deputeti Ervin Salianji ka dalë hapur kundër drejtimit aktual të PD-së, duke artikuluar kritika për mungesë reformimi, mbyllje ndaj mendimit ndryshe dhe për dështime elektorale të paadresuara. Nga ana tjetër, lidershipi i partisë i është përgjigjur me akuza se Salianji po ndërton një lëvizje personale, jashtë strukturave zyrtare.
Përplasja tashmë nuk fshihet më pas deklaratave diplomatike. Ajo është bërë publike, direkte dhe e lexueshme si betejë për kontrollin e një partie që sot ka më pak peshë elektorale sesa në çdo moment tjetër të historisë së saj.
Paradoksi politik është i qartë: në sheshin para Kryeministrisё kur edhe Adriatik Lapaj arrin të mbledhё më shumë qytetarë sesa protestat tradicionale të opozitës, energjia e PD-së vazhdon të shpenzohet në konfliktet e brendshme. Në vend që të konkurrojnë për të fituar besimin e publikut, palët konkurrojnë për një karrige në një opozitë që po tkurret.
Në këtë realitet, beteja Salianji–Berisha nuk është thjesht përplasje individësh. Është simptoma e një force politike që ende nuk ka vendosur nëse do të rindërtohet si alternativë qeverisëse, apo do të mbetet peng i cikleve të saj të brendshme.
Ndërkohë, qytetarët vazhdojnë të kërkojnë opozitë. Por ajo, për momentin, duket më e zënë duke kërkuar vetveten…
