Kuvendi i Shqipërisë mblidhet sot në seancë plenare, ku pritet të diskutohen një sërë çështjesh me rëndësi, nga interpelancat me anëtarët e qeverisë deri te projektligje që prekin ekonominë, diplomacinë dhe trashëgiminë kulturore. Seanca është thirrur për në orën 10:00.
Pjesë e rëndësishme e rendit të ditës janë dy interpelanca me ministren e Arsimit, Mirela Kumbaro, të kërkuara nga deputetët Erald Kapri dhe Erisa Xhixho.
Gjithashtu, ministrja e Shëndetësisë dhe Mirëqenies Sociale, Evis Sala, do të përballet me një seancë pyetje–përgjigje të kërkuar nga deputeti Erion Braçe.
Ndër projektligjet kryesore që pritet të shqyrtohen është ai “Për shërbimin e jashtëm në Republikën e Shqipërisë”, i cili do të kalojë në diskutim dhe votim me shumicë të thjeshtë.
Në axhendë janë edhe ndryshimet në ligjin “Për akcizat” dhe një shtesë në ligjin për tatimin mbi vlerën e shtuar (TVSH), të dyja të lidhura drejtpërdrejt me politikat fiskale.
Po ashtu, deputetët do të shqyrtojnë ndryshime në ligjin “Për Trashëgiminë Kulturore dhe Muzetë”, si dhe një projektvendim për miratimin e strukturës dhe pagave të personelit me kohë të pjesshme që do të angazhohet për përpunimin e materialeve zgjedhore pranë Komisionit Qendror të Zgjedhjeve.
Në rend dite është edhe një projektvendim për caktimin e anëtarëve zëvendësues në komisionet e përhershme parlamentare, ndërsa seanca do të mbyllet me diskutime për çështje jashtë axhendës, ku deputetët mund të marrin fjalën për deri në pesë minuta.
Seanca e sotme pritet të shoqërohet me debate politike, ndërsa një pjesë e nismave të parashikuara lidhen me fusha të ndjeshme si ekonomia, administrimi zgjedhor dhe politikat publike.
