Zbutje apo lëvizje taktike për të fokusuar sulmet dhe mos hapur shumë vatra armiqësie në rajon? Qëndron pa përgjigje pyetja dyshuese e gjithë analistëve të luftës, pas deklaratёs sё Presidentit iranian Pezeshkian.
Në një fjalim të shkurtër të regjistruar dhe të transmetuar nga televizioni shtetëror iranian, presidenti Pezeshkian njoftoi se këshilli i përkohshëm udhëheqës i Iranit kishte miratuar pezullimin e sulmeve ndaj vendeve fqinje nëse prej tyre nuk vinte fillimisht ndonjë sulm kundër Iranit. Madje, ai kërkoi falje për sulmet e kryera nga fillimi i luftës kundër Izraelit dhe SHBA duke justifikuar reagimin e ashpër të vendit të tij, pas vrasjes së udhëheqësit shpirtëror Khamenei.
Pezeshkian me tone të buta deklaroi edhe në emër personal: “Duhet t’u kërkoj falje vendeve fqinje që u sulmuan nga Irani, në emrin tim. Që tani e tutje, ata nuk duhet të sulmojnë vendet fqinje ose të qëllojnë me raketa drejt tyre, përveç nëse sulmohemi nga ato vende. Mendoj se duhet ta zgjidhim këtë çështje përmes diplomacisë.”.
Ndërsa deklaratës së presidentit Trump për “Dorëzim pa kushte të Iranit”, Pezeshkian iu kundërpërgjigj me një gjuhë të hidhur: “Ëndërr që ata duhet ta marrin me vete në varr”.
Analistët ndërkombëtarë dhe gjithë bota që mban frymën se ç’po ndodh në rajonin e Lindjes së Mesme, e pritën me entuziazëm këtë deklaratë që vjen nga Irani.
Irani ndan kufij tokësorë me shtete si: Irak, Turqi, Armeni, Azerbajxhan, Turkmenistan, Afganistan, Pakistan, por ka edhe kufij detarë me 6 vende të Gjirit Persik dhe Gjirit të Omanit që i ka sulmuar për një javë rresht si: Kuvajti, Arabia Saudite, Bahreini, Katari, Omani dhe Emiratet e Bashkuara Arabe (Abu Dhabi dhe Dubai).
Megjithëse në mëngjesin pas deklaratës ende u konfirmuan sulme në disa pika të Katarit apo aeroportin e Abu Dhabit ku u dëgjua një shpërthim, përsëri optimizmi u rrit në rajon për këtë deklaratë “miqësore” që erdhi nga ana e Iranit.
Të gjitha vendet e rajonit kanë bllokuar fluturimet, por pas deklaratës, rifilloi një linjë e veçantë ajrore nga Doha për në Evropë dhe Singapor. Qatar Airways do rifillojë një udhëtim të monitoruar nga Doha drejt Madridit, Parisit, Berlinit, Londrës dhe Singaporit duke i dhënë një frymëmarrje mijëra pasagjerëve të mbetur në rajonin tashmë të ndezur nga lufta në Lindjen e Mesme.
