Mes një seance maratonë që u zgjat deri pas mesnate, Kuvendi miratoi aktin normativ për uljen e akcizës së karburanteve, por në sfondin e debateve politike dhe përplasjeve për çmimet e naftës, mazhoranca kaloi edhe një seri emërimesh në institucionet e ashtuquajtura të pavarura, duke vulosur emra të njohur për afërsinë apo shërbimet ndaj pushtetit.
Në një sallë të tensionuar nga debatet mes opozitës dhe shumicës, ku vëmendja publike u fokusua te akciza dhe interpelanca me kryeministrin Edi Rama, maxhoranca votoi edhe emërimet e reja në disa institucione kyçe, të cilat teorikisht duhet të jenë të pavarura nga politika, por praktikisht vazhdojnë të prodhohen nga vota politike dhe interesat e saj.
Mes emrave më të komentuar ishte ai i ish-anëtares së institucioneve të vettingut, Genta Tafa Bungo, e cila u zgjodh Komisionere për Mbrojtjen nga Diskriminimi. Po ashtu, Alma Faskaj Vokopola u votua Komisionere për të Drejtat e Fëmijëve pranё Avokatit tё Popullit, duke kaluar nga sistemi i drejtësisë së reformuar drejt një tjetër posti publik të rëndësishëm.
Në të njëjtën paketë u konfirmua edhe Ahmet Prençi si Komisioner i Avokatit të Popullit për Mekanizmin Kombëtar për Parandalimin e Torturës. Emri i ish-drejtuesit të policisë është konsideruar prej kohësh pranë mazhorancës, ndërsa votimi i tij u lexua si një tjetër shpërblim politik për figura që kanë qenë funksionale për pushtetin në momente të caktuara.
Seanca u shoqërua me tensione të forta politike, pasi opozita kërkoi interpelancë direkte me kryeministrin Edi Rama, por ajo iu delegua ministres për Marrëdhëniet me Parlamentin, Erjona Ismaili. Refuzimi ndezi debate në sallë dhe akuza ndaj kryeparlamentarit Niko Peleshi për shkelje të rregullores dhe të Kushtetutës.
Në fund të natës parlamentare, përtej debatit politik, u vulos edhe njё herё fakti se institucionet “e pavarura” vazhdojnë të prodhohen, emërohen dhe kontrollohen nga vetë politika që duhet të mbikëqyrin.
