Pas një seance maratonë që zgjati rreth 18 orë, Kuvendi miratoi në orët e para të mëngjesit ndryshimet në Kodin Penal, me 85 vota pro të mazhorancës dhe 9 kundër nga opozita. Vendimi u mor në një kohë kur paralelisht po zhvillohen tryeza konsultative për hartimin e një Kodi të ri Penal, proces që teorikisht kërkon debat të gjerë publik dhe profesional. Megjithatë, pa pritur përfundimin e këtij diskutimi, ndryshimet në Kodin ekzistues u miratuan me shpejtёsi, duke e arnuar mё shumё.
Ndryshimet përfshijnë dekriminalizimin e shpifjes për gazetarët, qё nuk duket tё jetё ashtu si u servir, ashpërsimin e dënimeve për ndërtimet pa leje dhe zjarrvëniet, si edhe masa më të rënda për parkimin e dyfishtë, që parashikon gjobë ose deri në një vit burg. Po ashtu, parashikohen dënime më të ashpra për dhunë apo kanosje ndaj gazetarëve. Megjithatё, presim variantin e zbardhur tё ndryshimeve.
Ministri i Drejtësisë, Besfort Lamallari, e cilësoi miratimin si “hap të rëndësishëm drejt forcimit të shtetit të së drejtës dhe përmbushjes së detyrimeve për integrimin europian”, duke theksuar se puna për Kodin e ri Penal do të vijojë në muajt në vijim.
Por ndërsa vëmendja mediatike u përqendrua kryesisht te dekriminalizimi i shpifjes, në të njëjtën seancë kaluan pa debat publik dy ligje themelore që prekin drejtpërdrejt arkitekturën e sistemit të drejtësisë: ndryshimet në ligjin për statusin e gjyqtarëve dhe prokurorëve dhe ndryshimet në ligjin për organet e qeverisjes së sistemit të drejtësisë. Të dyja u miratuan me 85 vota pro dhe 10 kundër.
Po ashtu, u miratua ligji i ri për organizimin e komisioneve hetimore të Kuvendit – instrument kyç i kontrollit parlamentar – si dhe ligji për lobimin në Republikën e Shqipërisë.
Ky i fundit, i prezantuar si rregullim modern i marrëdhënieve mes interesave private dhe vendimmarrjes publike, nga ekspertёt shihet si ligj që rrezikon të legalizojë ndikimin e interesave të fuqishme ekonomike mbi politikën, në një vend ku transparenca mbi financimin dhe ndikimin real në vendimmarrje mbetet e brishtë.
Në fund të një nate votimesh, Kuvendi miratoi një paketë të gjerë ligjesh që prekin drejtësinë, kontrollin institucional dhe raportin mes pushtetit politik dhe interesave private. Shumë prej tyre kaluan pa debat të thelluar dhe pa vëmendjen publike që zakonisht do duhej tё shoqëronte ndryshime të kësaj peshe.
Ndërsa vendi diskuton ende për nevojën e një Kodi të ri Penal të hartuar me konsultim të gjerë, ndryshimet në Kodin ekzistues tashmë janë fakt. Dhe bashkë me to, edhe ligje që riformësojnë balancat e sistemit të drejtësisë – këtë herë, larg zhurmës së sallës plenare.
