Tenistja japoneze Naomi Osaka ka njoftuar tërheqjen e saj nga Australian Open 2026, vetëm pak orë para ndeshjes së raundit të tretë, për shkak të një dëmtimi abdominal që u përkeqësua gjatë përgatitjes për të zbritur në fushë.
Katër herë kampione Grand Slam, Osaka tha se vendimi për t’u tërhequr ishte emocionalisht i vështirë. “Ishte një vendim vërtet i trishtueshëm për mua. Doja shumë të luaja dhe kisha çdo qëllim ta bëja, por ende jam duke e përpunuar atë që po ndodh,” u shpreh ajo për TNT Sports.
Dëmtimi u shfaq gjatë ndeshjes së raundit të dytë kundër Sorana Cîrstea, ku Osaka u detyrua të marrë ndihmë mjekësore. Ajo shpresonte se pushimi do ta përmirësonte gjendjen, por gjatë pёrgatitjes për ndeshjen e radhës, dhimbja u shtua. “Mendova se mund ta përballoja, por nxemjes, u bëra shumë më keq,” tha ajo.
Tenistja 28-vjeçare theksoi gjithashtu se trupi i saj ka ndryshuar ndjeshëm pas shtatzënisë dhe lindjes së vajzës së saj në vitin 2023, duke e bërë rikthimin në nivelet e mëparshme më të ndërlikuar. “Trupi im ka ndryshuar shumë pas shtatzënisë. Duhet të bëj më shumë analiza dhe të jem shumë e kujdesshme,” deklaroi Osaka.
Në një postim në rrjetet sociale, ajo u shpreh se ishte e emocionuar për rrugëtimin në turne, por nuk mund të rrezikonte dëmtime të mëtejshme. “Më dhemb zemra që duhet të ndalem këtu, por nuk mund të rrezikoj trupin tim. Faleminderit për gjithë mbështetjen,” shkroi ajo.
Dy herë fituese e Australian Open, Naomi Osaka mbetet një nga figurat më të dashura të tenisit botëror, dhe rikthimi i saj i fundit pas mëmësisë kishte ngjallur pritshmëri të mëdha. Për momentin, prioriteti i saj është shëndeti.
