Ndeshja që shumëkush mezi e besonte se ishte reale përfundoi pikërisht ashtu siç pritej. Ish-kampioni i botës në peshat e rënda, Anthony Joshua, e mposhti me nokaut yllin e rrjeteve sociale të kthyer në boksier, Jake Paul, duke i shkaktuar këtij të fundit një dëmtim serioz në nofull gjatë duelit të zhvilluar në Miami.
Rezultati ishte i parashikueshëm, por kontrasti mes spektaklit mediatik përreth ndeshjes dhe asaj që ndodhi realisht në ring ngriti sërish pikëpyetje mbi drejtimin që po merr boksi profesionist.
Që në përballjen fizike para ndeshjes, diferencat ishin të dukshme. Joshua ishte rreth 13 centimetra më i gjatë dhe afro 14 kilogramë më i rëndë se Paul, një avantazh që e bënte pothuajse të pamundur që amerikani të konkurronte realisht në peshat e rënda. Diferenca në eksperiencë ishte edhe më e thellë: Joshua ka qenë për më shumë se një dekadë mes boksierëve më të mirë në botë, ndërsa Paul ka vetëm pesë vite në ring, kryesisht kundër kundërshtarëve jashtë kulmit të tyre sportiv.
Megjithatë, Paul hyri në ring me bindjen se mund të sillte surpriza. Për dy raundet e para, strategjia e tij për të shmangur kontaktin funksionoi: lëvizje të vazhdueshme, distancë dhe pak shkëmbime goditjesh. Por kjo solli një duel të zbehtë për publikun, larg pritshmërive të krijuara nga reklama masive.
Me kalimin e raundeve, lodhja e Paul-it u bë e dukshme. Joshua filloi të shkurtonte distancën dhe të lidhte goditje gjithnjë e më të forta. Një goditje në raundin e pestë e tronditi rëndë amerikanin, ndërsa në raundin e gjashtë erdhi fundi: një goditje e fuqishme e djathtë nga Joshua e rrëzoi Paul-in në tapet, duke i dhënë fund ndeshjes.
Pas përballjes, Jake Paul u shfaq i gjakosur, por sportiv në deklarata. “Ishte një mësim i fortë nga një prej më të mirëve të historisë. E pranova me kënaqësi,” tha ai. Më vonë, Paul konfirmoi se kishte pësuar thyerje të dyfishtë të nofullës dhe iu nënshtrua një ndërhyrjeje kirurgjikale. Megjithatë, ai nuk e humbi humorin dhe në një postim në Instagram shkroi me shaka “Ma sillni Canelo-n pas 10 ditësh”, duke ironizuar mbi gjendjen e tij dhe duke dërguar sërish një mesazh sfidues për botën e boksit.
Joshua, nga ana tjetër, tregoi respekt për kundërshtarin, duke theksuar guximin e tij për të hyrë në ring me një boksier elitar, por duke lënë të kuptohet se ky ishte kufiri real i eksperimentit.
Sa i përket së ardhmes, Joshua pritet të rikthehet te përballjet me boksierë të nivelit të tij, me një duel të mundshëm kundër Tyson Fury në horizont. Për Paul-in, rikthimi duket i pashmangshëm, sepse kudo që shkon ai, vëmendja globale e ndjek.
Ndërkohë, për vetë sportin e boksit, kjo ndeshje ishte një tjetër sinjal alarmi. Ndeshjet nё kushte tё pabarabarta sjellin shifra të mëdha shikueshmërie dhe fitime financiare, por lënë pas edhe shqetësimin se mё shumё kёrkohet spektakёl, sesa meritë sportive.
(Burimi: CNN)
