Një pallat i ri banimi në Lion të Francës premton të ndryshojë mënyrën se si ndërtohen dhe funksionojnë banesat. Ndërtesa shtatëkatëshe, me 23 apartamente, është projektuar për të ruajtur temperaturën e brendshme pa përdorur sisteme tradicionale ngrohjeje apo kondicionerë. Sekreti qëndron te materialet e ndërtimit, të cilat grumbullojnë dhe çlirojnë energji, duke shfrytëzuar nxehtësinë e diellit dhe atë që prodhohet nga aktivitetet e përditshme brenda banesave.
Projekti, i quajtur Essential, u prezantua më 17 nëntor në lagjen Confluence të Lionit, një zonë urbane që po kalon një proces të vazhdueshëm transformimi.
Ndërtesa është zhvilluar nga kompania franceze e pasurive të paluajtshme Nexity, në bashkëpunim me studion austriake të arkitekturës Baumschlager Eberle.
Me formën e saj kubike, fasadën e bardhë dhe arkitekturën minimaliste, që të kujton stilin brutalist, pallati konsiderohet i pari i këtij lloji në Francë.
Por risia kryesore nuk është pamja e jashtme. Është mënyra se si ndërtesa është projektuar për të kontrolluar temperaturën e ambienteve të brendshme.
Sipas zhvilluesve, gjatë dimrit temperatura në apartamente synohet të qëndrojë ndërmjet 20 dhe 22 gradë Celsius, pa pasur nevojë për ngrohje tradicionale.
Ndërsa gjatë valëve të të nxehtit, temperatura e brendshme parashikohet të qëndrojë ndërmjet 26 dhe 28 gradë Celsius, pa përdorur kondicionerë.
Ky koncept është zhvilluar nga arkitekti austriak Dietmar Eberle si përgjigje ndaj krizës energjetike dhe ndryshimeve klimatike.
Ai njihet me emërtimin 22-26, një referencë ndaj intervalit të temperaturave që ndërtesat e projektuara sipas kësaj filozofie synojnë të ruajnë.
Ideja mbështetet në një parim relativisht të thjeshtë: në vend që temperatura e ambienteve të rregullohet vazhdimisht përmes pajisjeve që konsumojnë energji, vetë struktura e ndërtesës duhet të ndihmojë në ruajtjen e saj.
Për këtë qëllim, arkitektët kanë zgjedhur materiale me aftësi të lartë për të grumbulluar dhe çliruar gradualisht energjinë termike.
Kjo karakteristikë njihet si inerci termike.

Gjatë periudhave kur ambienti ngrohet, materialet thithin një pjesë të nxehtësisë. Kur temperatura fillon të ulet, ato e çlirojnë gradualisht energjinë e grumbulluar, duke ndihmuar në stabilizimin e temperaturës së brendshme.
“Materialet luajnë një rol kryesor dhe janë përzgjedhur për një karakteristikë të përbashkët: aftësinë e tyre për të ruajtur dhe çliruar energji”, shpjegoi Anne Speicher, drejtuese e studios Baumschlager Eberle, për median franceze Vert.
Një element tjetër thelbësor është mbështjellja izoluese e ndërtesës, e projektuar për të kufizuar humbjen e nxehtësisë gjatë dimrit dhe për të ruajtur freskinë gjatë verës.
Për ndërtimin janë përdorur tulla të posaçme Monomur, të prodhuara nga terrakota me zgavra të brendshme, së bashku me beton dhe suva me bazë gëlqereje.
Kombinimi i këtyre materialeve synon të krijojë një strukturë që ruan energjinë termike dhe ngadalëson ndryshimet e temperaturës brenda apartamenteve.
Drita e diellit shfrytëzohet gjithashtu si burim natyror nxehtësie, ndërsa projektimi i ndërtesës synon të kufizojë humbjet e energjisë së grumbulluar.
Në këtë mënyrë, nxehtësia që hyn nga jashtë, si edhe ajo që krijohet gjatë përdorimit të përditshëm të banesave, mund të kontribuojë në ruajtjen e temperaturës së brendshme.
Megjithatë, projekti mbetet një risi që duhet ta provojë efektivitetin e tij në praktikë.
Edhe pse zhvilluesit premtojnë temperatura të qëndrueshme pa ngrohje dhe kondicionim tradicional, rezultatet reale do të varen nga funksionimi i ndërtesës gjatë stinëve dhe kushteve të ndryshme klimatike.
Nëse koncepti rezulton i suksesshëm, ai mund të ofrojë një model të ri për ndërtimin e banesave me konsum shumë të ulët energjie, në një kohë kur rritja e kostove të energjisë dhe ndryshimet klimatike po i detyrojnë qytetet të kërkojnë zgjidhje të reja arkitekturore.

Burimi: Euronews






