Një organizatë kundër korrupsionit dhe dy qytetarë amerikanë kanë ngritur një padi federale për të ndaluar eventin e madh të UFC-së që Presidenti Donald Trump planifikon të organizojë më 14 qershor në Shtëpinë e Bardhë, në të njëjtën ditë kur ai mbush 80 vjeç.
Padia u depozitua vetëm pak ditë para zhvillimit të aktivitetit, i cili po organizohet nga Ultimate Fighting Championship (UFC) si pjesë e festimeve për 250-vjetorin e pavarësisë së Shteteve të Bashkuara.
Në qendër të debatit është transformimi i lëndinës jugore të Shtëpisë së Bardhë në një arenë për ndeshje të arteve marciale mikse. Javët e fundit, vëmendjen e ka tërhequr ngritja e një strukture gjigante çeliku prej rreth 600 tonësh, e cila do të shërbejë si skena kryesore e eventit.
Sipas padisë, Kongresi nuk ka autorizuar kurrë përdorimin e ambienteve federale për një aktivitet të tillë privat dhe fitimprurës.
Paditësit argumentojnë se eventi favorizon drejtpërdrejt presidentin e UFC-së, Dana White, si dhe vetë Donald Trump, i cili zotëron aksione në TKO Holding Group, kompania mëmë e UFC-së.
“Presidenti po i jep Dana White dhe kompanisë së tij diçka që askush nuk e ka pasur më parë: akses të pakufizuar në Shtëpinë e Bardhë dhe Memorialin Lincoln për të organizuar një aktivitet privat fitimprurës, me të gjitha përfitimet promovuese dhe komerciale që sjell ky privilegj”, thuhet në dokumentin gjyqësor.
Memoriali Lincoln pritet të përdoret për ceremonitë zyrtare të peshimit të sportistëve para ndeshjeve.
Akuza për konflikt interesi
Padia fokusohet veçanërisht te përfitimet financiare që mund të rrjedhin nga eventi.
Ajo citon raportime sipas të cilave UFC po shet paketa VIP për më shumë se 1 milion dollarë për person, ndërsa të drejtat e transmetimit do të gjenerojnë të ardhura të konsiderueshme për Paramount Skydance, kompani mediatike e kontrolluar nga Larry dhe David Ellison, të cilët konsiderohen aleatë të Trump.
Paditësit theksojnë gjithashtu se Trump bleu aksione të TKO Holding Group me vlerë mes 15 mijë dhe 50 mijë dollarëve në mars të këtij viti, ndërsa në të njëjtën kohë promovonte publikisht eventin.
Sipas tyre, kjo krijon një konflikt të mundshëm interesi.
“Nuk është festë kombëtare, por festë ditëlindjeje”
Megjithëse UFC dhe organizatorët e paraqesin aktivitetin si pjesë të festimeve për 250-vjetorin e pavarësisë amerikane, paditësit argumentojnë se data e zgjedhur ngre pikëpyetje.
Eventi do të zhvillohet më 14 qershor, pothuajse tre javë para Ditës së Pavarësisë së SHBA-së më 4 korrik, por përkon saktësisht me 80-vjetorin e lindjes së Donald Trump.
“Ky aktivitet nuk është në të vërtetë për 250-vjetorin e pavarësisë amerikane dhe, mbi të gjitha, nuk po planifikohet, organizohet apo ekzekutohet nga qeveria federale”, thuhet në padi.
Reagimi i Shtëpisë së Bardhë
Shtëpia e Bardhë e ka cilësuar padinë si “penguese” dhe pa bazë ligjore.
Në një deklaratë për mediat, administrata Trump argumentoi se aktiviteti nuk ndryshon nga evente të tjera të organizuara më parë në ambientet presidenciale.
Ndërkohë, UFC nuk ka komentuar ende zyrtarisht mbi padinë.
Kush po padit?
Padia është ngritur nga Susan Douglas, një aktiviste politike në pension, dhe Paul Romano, veteran i Luftës së Vietnamit.
Të dy pretendojnë se frekuentojnë rregullisht zonën përreth monumenteve kombëtare dhe se organizimi i një spektakli sportiv pranë tyre shkakton atë që në dokument përshkruhet si “dëmtim estetik” të hapësirave publike historike.
Çështja i është caktuar gjyqtarit federal Amit P. Mehta, i cili do të vendosë fillimisht nëse paditësit kanë bazë ligjore të mjaftueshme për ta çuar procesin më tej.
Nëse gjykata nuk ndërhyn, ndeshjet UFC do të zhvillohen sipas planit më 14 qershor, në një prej eventeve më të pazakonta që janë organizuar ndonjëherë në territorin e Shtëpisë së Bardhë.
Burimi: NYT
