Gati 30 vjet pas vrasjes së Tupac Shakur, një prej mistereve më të mëdha në historinë e muzikës hip-hop ka arritur për herë të parë në një vendim fajësie. Një juri në Las Vegas shpalli fajtor Duane “Keffe D” Davis, 63 vjeç, për organizimin e vrasjes së reperit amerikan në vitin 1996.
Davis u shpall fajtor të hënën për vrasje me përdorimin e një arme vdekjeprurëse dhe tashmë rrezikon një dënim deri në burgim të përjetshëm. Jurisë iu deshën më pak se tre orë për të marrë vendimin, pas një procesi që zgjati disa javë.
Në sallën e gjyqit ndodhej edhe motra e Tupac, Sekyiwa “Set” Shakur, e cila shpërtheu në lot dhe përqafoi prokurorët pasi u lexua vendimi. I pranishëm ishte edhe djali i Davis, i cili mbuloi fytyrën me dorë.
Prokuroria argumentoi se Davis siguroi armën dhe organizoi sulmin ndaj Tupac dhe bashkëthemeluesit të kompanisë Death Row Records, Marion “Suge” Knight, si hakmarrje për një konflikt që kishte ndodhur vetëm disa orë më parë.
Gjithçka nisi mbrëmjen e 7 shtatorit 1996 në Las Vegas. Tupac dhe njerëzit e tij ishin përfshirë në një përleshje me Orlando “Baby Lane” Anderson, nipin e Davis. Sipas prokurorisë, pas incidentit Davis dhe personat që ndodheshin me të nisën të kërkonin Tupac dhe Knight.
Më vonë atë mbrëmje, makina ku ndodhej Tupac u ndal në një semafor. Një Cadillac i bardhë u afrua pranë saj dhe nga automjeti u qëllua disa herë me armë.
Tupac u plagos rëndë dhe vdiq gjashtë ditë më vonë, në moshën 25-vjeçare. Suge Knight gjithashtu u plagos, por mbijetoi.
Për dekada askush nuk u akuzua për vrasjen, pavarësisht se çështja u kthye në një prej mistereve kriminale më të famshme të SHBA-së. Vetë Davis, megjithatë, filloi me kalimin e viteve të fliste publikisht për atë natë, duke pranuar se kishte qenë brenda Cadillac-ut nga ku u qëllua reperi.
Në intervista të ndryshme ai kishte deklaruar gjithashtu se ia kishte dhënë armën personave që ndodheshin në sediljen e pasme, megjithëse nuk kishte treguar gjithmonë se kush e kishte tërhequr këmbëzën.
Pikërisht këto deklarata u kthyen në një pjesë të rëndësishme të çështjes së prokurorisë kundër tij.
Prokurorët nuk pretenduan se Davis ishte domosdoshmërisht personi që qëlloi Tupac. Akuza ishte se ai siguroi armën dhe urdhëroi sulmin, çka sipas ligjit të Nevadës mjafton për ta mbajtur penalisht përgjegjës për vrasjen.
“Pyetja nuk është se kush qëlloi”, u tha prokurori Binu Palal anëtarëve të jurisë.
Sipas akuzës, sulmi nuk ishte një reagim spontan. Grupi kishte kërkuar Tupac përpara se ta pikaste në rrugë, të kthente makinën dhe t’i afrohej automjetit të tij.
“Është një plan, jo një impuls”, argumentoi prokurori. Në qendër të procesit u vendosën edhe deklaratat që Davis kishte dhënë ndër vite, si dhe libri i tij i vitit 2019, “Compton Street Legend”. Mbrojtja argumentoi se rrëfimet e tij ishin ekzagjeruar apo fabrikuar për të fituar para dhe famë, ndërsa prokuroria këmbënguli se, pavarësisht ndryshimeve në disa detaje, një element kishte mbetur i pandryshuar: Davis e vendoste vazhdimisht veten në Cadillac-un e bardhë nga ku u krye sulmi.
Në gjyq dëshmuan 24 dëshmitarë të prokurorisë dhe tre të mbrojtjes gjatë nëntë ditëve të dëshmive. Prokurorët sollën gjithashtu prova për rivalitetin mes bandave South Side Compton Crips dhe Mob Piru, të lidhura me përplasjen e ashpër që karakterizonte një pjesë të skenës hip-hop të viteve 1990 dhe rivalitetin mes Death Row Records dhe Bad Boy Records.
Davis është i vetmi person ende gjallë nga katër burrat që, sipas prokurorëve, ndodheshin në Cadillac natën kur u vra Tupac.
Vendimi i jurisë shënon kështu dënimin e parë në historinë gati 30-vjeçare të çështjes së vrasjes së Tupac Shakur, një krim që për dekada prodhoi teori, dokumentarë, libra dhe spekulime të panumërta, por asnjë person të shpallur fajtor.
Tani, për herë të parë që nga nata e 7 shtatorit 1996, çështja ka një të dënuar: Duane “Keffe D” Davis, njeriun që prokurorët e konsiderojnë organizatorin e sulmit që i mori jetën një prej figurave më të rëndësishme të historisë së hip-hop-it.
