India ka vendosur masa të reja sigurie për barnat kundër kancerit, me synimin për të përmirësuar gjurmueshmërinë e tyre dhe për të frenuar përhapjen e ilaçeve të falsifikuara.
Sipas Ministrisë indiane të Shëndetësisë dhe Mirëqenies Familjare, prodhuesit e të gjitha barnave kundër kancerit që shiten në Indi do të kenë kohë deri në korrik 2027 për të vendosur në paketimin e tyre një kod QR ose barkod, i cili do të mundësojë ndjekjen e rrugëtimit të barit nga fabrika deri te pacienti.
Kërkesa do të zbatohet si për barnat e prodhuara në Indi, ashtu edhe për ato të importuara, përfshirë Keytruda-n.
Masa vjen pas një hetimi të përbashkët të International Consortium of Investigative Journalists (ICIJ) dhe The Indian Express, i cili zbuloi mënyrën se si falsifikuesit në Indi shfrytëzonin çmimin jashtëzakonisht të lartë të Keytruda-s dhe dëshpërimin e pacientëve me kancer për të shitur versione të falsifikuara të ilaçit.
Një nga rastet më të flagrante ndodhi në vitin 2024, kur policia në Nju Delhi arrestoi 12 persona të dyshuar se kishin marrë flakonë bosh të Keytruda-s nga spitale dhe farmaci dhe i kishin rimbushur me një ilaç antifungal. Më pas, sipas autoriteteve, produktet e falsifikuara shiteshin për një çmim shumë më të ulët se ilaçi origjinal.
Problemi merr përmasa veçanërisht serioze në Indi, ku Keytruda është i paarritshëm për shumicën e familjeve. Çmimi i tregut për një flakon 100 mg arrin në rreth 150.000 rupi, ose më shumë se 1.500 dollarë amerikanë. Rasti nuk preku vetëm pacientët indianë: të paktën një grua nga Nepali kishte blerë ilaç nga një prej personave të akuzuar.
Pas arrestimeve, bordi kombëtar këshillimor për barnat në Indi shqyrtoi mundësinë e përfshirjes së barnave kundër kancerit në listën e rreth 300 barnave që tashmë i nënshtrohen kërkesave të detyrueshme për kode QR ose barkode.
Kërkesa të ngjashme për përdorimin e kodeve QR po zbatohen edhe për vaksinat, antimikrobikët dhe narkotikët. Kodet duhet të përmbajnë nëntë të dhëna identifikuese, ndër to: numrin unik të identifikimit të çdo njësie; datën e prodhimit; datën e skadimit; emrin dhe adresën e prodhuesit.
Megjithatë, sistemi nuk konsiderohet i pagabueshëm. Një ekspert i cituar nga The Indian Express paralajmëroi se falsifikuesit mund të përpiqen të përdorin të njëjtin paketim për të anashkaluar sistemin. Në një skenar të tillë, falsifikimi mund të funksionojë vetëm nëse produkti fals regjistrohet dhe blihet në sistem përpara produktit të vërtetë.
Skandali “Keytruda” ka treguar se gjurmueshmëria dixhitale e barnave nuk është më thjesht një çështje teknike apo administrative, por një komponent i drejtpërdrejtë i sigurisë së pacientit. Për një treg ku çmimet e larta, mungesa e aksesit dhe dëshpërimi i pacientëve krijojnë terren për falsifikimin e barnave, aftësia për të verifikuar origjinën dhe lëvizjen e çdo flakoni nga prodhuesi te pacienti mund të jetë një mekanizëm i rëndësishëm mbrojtës.
