Marrja e një banese me qira në Holandë po bëhet gjithnjë e më e vështirë, pasi qiraja mesatare në tregun privat ka arritur në 1.914 euro në muaj. Pronarët kërkojnë zakonisht që të ardhurat e qiramarrësve të jenë trefishi i qirasë, çka do të thotë se për një banesë mesatare nevojiten rreth 5.742 euro të ardhura bruto mujore.
Çmimet e qirave në Holandë kanë arritur një nivel të ri rekord, ndërsa numri i banesave të disponueshme vazhdon të bjerë, duke e bërë gjithnjë e më të vështirë gjetjen e një shtëpie për familjet, të rinjtë dhe të huajt që jetojnë apo kërkojnë të punojnë në vend.
Sipas të dhënave të platformave të pasurive të paluajtshme Huurwoningen.nl dhe Pararius, qiraja mesatare e një banese në sektorin privat ka arritur në 1.914 euro në muaj, duke shënuar një rritje prej 2,4% krahasuar me të njëjtën periudhë të vitit të kaluar.
Rritja është edhe më e ndjeshme kur llogaritet çmimi për metër katror. Gjatë së njëjtës periudhë, qiraja për metër katror është rritur me 4,4%, duke tejkaluar si inflacionin, ashtu edhe ritmin e rritjes së çmimeve të banesave për shitje. Aktualisht, qiramarrësit paguajnë mesatarisht 20,92 euro për metër katror.
Në sektorin privat me qira të lirë, pronarët kanë mundësi t’i përcaktojnë çmimet sipas tregut, ndërsa për banesat që përfshihen në segmentet e rregulluara zbatohen kufizime ligjore. Në Holandë, këto kufizime bazohen në një sistem pikësh që merr në konsideratë sipërfaqen, cilësinë dhe pajisjet e banesës. Kufiri i përmendur në të dhënat e fundit është 1.228,07 euro në muaj.
Përveç rritjes së çmimeve, tregu holandez po përballet edhe me një mungesë të theksuar të ofertës. Gjatë tremujorit të tretë të vitit 2026, numri i banesave të dhëna me qira ishte rreth 1.585 më i lartë sesa numri i banesave të reja që dolën në treg, duke krijuar diferencën më të madhe mes ofertës dhe kërkesës që prej vitit 2024.
Situata është veçanërisht problematike për banesat me qira më të ulët, numri i të cilave ka rënë me 23% krahasuar me tremujorin e tretë të vitit 2025. Kjo do të thotë se kategoritë e banesave që mund të përballohen nga personat me të ardhura mesatare apo të ulëta po zhduken më shpejt nga tregu.
Një nga arsyet e kësaj prirjeje lidhet me vendimin e shumë pronarëve për t’i shitur banesat në vend që të vazhdojnë t’i japin me qira. Që prej hyrjes në fuqi të Ligjit për Qiratë e Përballueshme, në korrik 2024, i cili vendosi kufizime për qiratë e segmentit të mesëm, një numër i konsiderueshëm pronarësh kanë zgjedhur të largohen nga tregu i qiradhënies.
Drejtori i Pararius, Jasper de Groot, e ka kritikuar ndikimin e kësaj reforme, duke argumentuar se ligji, i cili synonte të rriste mundësitë për banesa me qira të përballueshme, ka prodhuar efektin e kundërt.
Sipas tij, më shumë se 76 mijë banesa me qira janë larguar nga tregu që prej hyrjes në fuqi të ligjit, duke kufizuar më tej ofertën për personat që kërkojnë strehim.
Prirja e shitjes së banesave nuk kufizohet më vetëm te pronat me qira relativisht të ulët. Gjatë tremujorit të tretë të vitit 2026, 32,7% e banesave të shitura që më parë jepeshin me qira kishin një qira mujore mbi 2.000 euro, krahasuar me 21,3% në të njëjtën periudhë të vitit të kaluar.
Një tjetër pengesë për qiramarrësit lidhet me kriteret financiare që vendosin pronarët. Në Holandë, është praktikë e zakonshme që qiramarrësit të dëshmojnë të ardhura bruto mujore të paktën tri herë më të larta se vlera e qirasë.
Me qiranë mesatare prej 1.914 eurosh, kjo përkthehet në një kërkesë për 5.742 euro të ardhura bruto në muaj, ose rreth 68.900 euro në vit.
Ky nuk është një detyrim i përgjithshëm ligjor, por një kriter që përdoret shpesh nga pronarët dhe agjencitë e pasurive të paluajtshme. Në varësi të pronës dhe pronarit, kërkesat mund të jenë më të larta ose më të ulëta.
Megjithatë, diferenca me nivelin e pagave është e konsiderueshme. Paga mesatare vjetore në Holandë është rreth 40.800 euro, shumë më e ulët se niveli i të ardhurave që kërkohet zakonisht për të marrë me qera një banesë me çmimin mesatar të tregut privat.
Edhe për një banesë në kufirin më të ulët të segmentit privat, me qira 1.228,07 euro në muaj, një qiramarrësi mund t’i kërkohen të ardhura bruto prej rreth 3.684 eurosh në muaj, bazuar në kriterin e trefishit të qirasë.
Kjo situatë prek veçanërisht personat që jetojnë me një pagë të vetme, të rinjtë që sapo hyjnë në tregun e punës dhe punonjësit e huaj që zhvendosen në Holandë për të filluar një punë të re.
Burimi: IamExpat
