Telefonët e rinj Samsung, përfshirë serinë Galaxy S26, mund të jenë më të shtrenjtë se modelet e mëparshme. Arsyeja lidhet me mungesën globale të memories elektronike, një problem që po prek prodhuesit e teknologjisë në mbarë botën.
Bashkëdrejtori i Samsung, TM Roh, ka pranuar se kompania nuk mund t’i shmangë pasojat e kësaj situate. Në një deklaratë për Reuters, ai tha se rregullimet e çmimeve janë “të pashmangshme”, edhe pse nuk konfirmoi drejtpërdrejt një rritje.
Sipas burimeve të mediave koreano-jugore, Samsung po shqyrton mundësinë që modelet Galaxy S26 me 256 GB të kenë një rritje çmimi prej rreth 40 deri në 60 dollarë. Kjo vjen në një kohë kur edhe analistët paralajmërojnë se telefonët inteligjentë këtë vit mund të bëhen 6% deri në 8% më të shtrenjtë, nëse mungesat vazhdojnë.
Problemi nuk prek vetëm telefonat. Samsung ka bërë të ditur se mungesa e memories mund të ndikojë edhe te televizorët dhe pajisjet shtëpiake, si frigoriferët, lavatriçet dhe tharëset, pasi kompania është një nga prodhuesit më të mëdhenj në këto fusha.
Pavarësisht vështirësive, Samsung synon të zgjerojë përdorimin e inteligjencës artificiale. Kompania dëshiron që në vitet e ardhshme mbi 800 milionë pajisje të saj të kenë funksione të integruara AI, duke përfshirë telefonë, tableta dhe pajisje të tjera inteligjente.
Prezantimi zyrtar i Galaxy S26 pritet të mbahet në fund të muajit shkurt në San Francisko, ku do të bëhen të ditura çmimet përfundimtare dhe risitë e reja të telefonit.
(Burimi: PCMag / Reuters)
