Turizmi me kafshët shtëpiake po shndërrohet në një nga tregjet më fitimprurëse të industrisë turistike në Itali, me një vlerë që këtë vit pritet të arrijë në 9.5 miliardë euro. Megjithatë, sipas ekspertëve, potenciali real i këtij sektori mund të shkojë deri në afro 16 miliardë euro.
Sipas një studimi të JFC, në Itali numërohen rreth 16.5 milionë qen dhe mace të regjistruara — më shumë se dy herë numri i fëmijëve nën 14 vjeç. Vetëm gjatë verës së vitit 2026, rreth 4 milionë familje italiane pritet të bëjnë të paktën një pushim së bashku me kafshën e tyre shtëpiake.
Mesatarisht, italianët do të kalojnë 12 ditë pushime me qenin ose macen e tyre, duke shpenzuar rreth 22 euro më shumë në ditë për nevojat e kafshës.
Destinacionet më të preferuara mbeten zonat malore dhe Apeninet, ndërsa Trentino-Alto Adige konsiderohet rajoni më “pet-friendly” në Itali, i ndjekur nga Emilia-Romagna dhe Toskana. Jashtë vendit, francezët, spanjollët dhe gjermanët rezultojnë më të hapur ndaj turistëve që udhëtojnë me kafshë.
Megjithatë, raporti evidenton një problem të madh: industria turistike italiane ende nuk është përshtatur realisht me këtë treg.
Shumë struktura akomoduese vazhdojnë të aplikojnë tarifa shtesë për kafshët, kanë kufizime të shumta ose promovojnë në heshtje shërbimet për pronarët e qenve dhe maceve, për të mos “shqetësuar” klientët e tjerë.
Eksperti Massimo Feruzzi thotë se ndërsa hotelet për familje me fëmijë ofrojnë paketa të plota dhe favore të shumta, për kafshët shtëpiake ende mungojnë shërbimet bazike, nga hapësirat e dedikuara te restorantet apo transporti i përshtatshëm.
Sipas studimit, 4 në 10 italianë heqin dorë nga pushimet me kafshën e tyre pikërisht për shkak të vështirësive në organizim.
Problemi kryesor mbetet gjetja e strukturave që pranojnë kafshë, ndërsa shumë të tjerë ankohen për mungesën e transportit të përshtatshëm, restoranteve ku lejohen kafshët apo hapësirave të gjelbra.
Një nga rastet që shkaktoi debat ishte propozimi në Tirolin e Jugut për një taksë turistike prej 1.50 euro në ditë për qentë, ide që u tërhoq pas kritikave të forta publike.
Ekspertët paralajmërojnë se ndryshimet sociale — me rënien e lindshmërisë dhe rritjen e adoptimit të kafshëve — do ta bëjnë këtë sektor edhe më të rëndësishëm në vitet e ardhshme.
(Burimi: ANSA)
