Kryeministri Edi Rama ka ndarë sot një tjetër postim entuziast në rrjetet sociale, ku e përshkruan si “historike” mbledhjen e parë të përbashkët ndërqeveritare mes Shqipërisë dhe Italisë, që po zhvillohet në Romë. Sipas tij, takimi i dy qeverive i hap rrugën 16 marrëveshjeve të reja bashkëpunimi.
“MIRËMËNGJES dhe me krenarinë për një tjetër ditë historike në marrëdhëniet ndërkombëtare të Shqipërisë… për t’i hapur rrugë 16 marrëveshjeve të reja konkrete të bashkëpunimit… ju uroj një ditë të mbarë”, shkruan Rama në Facebook.
Megjithëse kryeministri e paraqet mbledhjen si një arritje të rëndësishme, deri më tani detajet konkrete të marrëveshjeve nuk janë bërë publike në mënyrë të plotë, ndërsa shumë prej fushave të përmendura—shëndetësia, energjia, mjedisi, industria e sigurisë, arsimi, migracioni—janë linja bashkëpunimi të deklaruara edhe më herët, shpesh pa rezultate të prekshme.
Në një video të publikuar pak më herët, Rama shfaqet në ceremoninë e shkëmbimit të marrëveshjeve, të cilat i prezanton si pjesë të një “partneriteti të ngushtë strategjik” me Italinë. Në përshkrimin e videos përmenden fusha të gjera bashkëpunimi, nga inovacioni te diaspora e deri te transformimi ekonomik, pa sqaruar ende cilat projekte konkrete do të ndjekin pas nënshkrimeve.
Takimi në Romë pritet të përmbyllet me detajimin e marrëveshjeve dhe deklarata të dy delegacioneve, ku do të kuptohet sesa konkrete dhe të zbatueshme janë angazhimet e njoftuara.
