Banka Qendrore e Rusisë ka deklaruar se kartat Visa dhe Mastercard duhet të largohen përfundimisht nga tregu rus, pasi sipas autoriteteve ato nuk ofrojnë më funksionet që garantonin më parë dhe kostot e mirëmbajtjes po mbulohen tashmë nga sistemi kombëtar rus i pagesave.
Drejtoresha e Departamentit të Sistemit Kombëtar të Pagesave në Bankën e Rusisë, Alla Bakina, tha se Visa dhe Mastercard praktikisht janë larguar prej kohësh nga tregu rus, ndërsa pjesa e tyre në qarkullim ka rënë ndjeshëm gjatë viteve të fundit.
Sipas saj, aktualisht këto karta përbëjnë më pak se 17% të tregut rus të pagesave, pasi bankat po i zëvendësojnë gradualisht me kartat vendase “Mir”, të zhvilluara nga Rusia pas sanksioneve perëndimore.
“Pozicioni ynë është se këto karta duhet të largohen nga tregu rus, sepse nuk ofrojnë më funksionalitetin që kishin dikur, ndërkohë që Sistemi Kombëtar i Kartave vazhdon të mbajë kostot e mbështetjes së tyre”, deklaroi Bakina.
Ekspertët rusë të ekonomisë dhe sistemit bankar thanë për agjencinë TASS se procesi nuk pritet të krijojë panik apo probleme për qytetarët, pasi tranzicioni drejt kartave “Mir” do të jetë gradual dhe i kontrolluar.
Makroekonomisti Sergey Vasilkovsky tha se shumë karta Visa dhe Mastercard në Rusi vazhdojnë të funksionojnë edhe pas datës së skadencës, gjë që sipas tij krijon probleme sigurie dhe e bën të arsyeshëm kalimin sistematik drejt kartave vendase.
Pas vendosjes së sanksioneve perëndimore ndaj Moskës, Visa dhe Mastercard pezulluan operacionet e tyre ndërkombëtare në Rusi, ndërsa sistemi “Mir” u kthye në alternativёn kryesore për pagesat brenda vendit.
(Burimi: TASS)
