Sa duhet të fitojë një person për të jetuar i qetë, pa ankthin e faturave, kredive dhe shpenzimeve të përditshme? Në një kohë kur kostoja e jetesës po rëndon gjithnjë e më shumë mbi familjet, ekspertët financiarë amerikanë kanë përllogaritur të ardhurat dhe kursimet e nevojshme për të pasur siguri ekonomike në vitin 2026. Por përfundimi është interesant: edhe njerëzit që fitojnë qindra mijëra dollarë në vit mund të jetojnë nën stres financiar.
Sipas një sondazhi të Shoqatës Amerikane të Psikologjisë, të zhvilluar në tetor me 3,132 të rritur, rreth 77% e amerikanëve e konsiderojnë koston e jetesës një burim të rëndësishëm stresi.
Qiraja, këstet e kredive, ushqimet, kujdesi për fëmijët dhe shpenzimet e tjera të domosdoshme po e bëjnë gjithnjë e më të vështirë arritjen e stabilitetit financiar.
Por sa para duhen konkretisht?
Sipas ekspertëve, përgjigjja ndryshon në varësi të vendit ku jeton, madhësisë së familjes dhe mënyrës se si i administron të ardhurat.
Dave Wangberg, ekspert i këshillimit financiar, shpjegon se të jetosh rehat financiarisht nuk do të thotë domosdoshmërisht të jesh i pasur.
Sipas tij, një person është financiarisht i qetë kur arrin të paguajë të gjitha faturat mujore, të përballojë shpenzimet e familjes dhe njëkohësisht të ketë mundësi të shijojë jetën, të dalë për darkë, të bëjë pushime apo të financojë aktivitetet e fëmijëve, pa frikën se nuk do t’i mbeten para për nevojat bazë.
Eksperti Anthony Guerriero sugjeron që siguria financiare të matet përmes dy treguesve: shumës që mbetet nga paga pasi paguhen shpenzimet dhe borxhet, si dhe kursimeve që disponon një person përtej fondit të emergjencës.
Nëse dikujt i mbeten 2,000 dollarë në muaj pas shpenzimeve dhe ka 6,000 dollarë kursime të lira, atëherë mundësitë e tij reale financiare përcaktohen kryesisht nga të ardhurat mujore të disponueshme.
Sipas ekspertit Sepehr Parsa, vendbanimi luan një rol vendimtar. Në vende ku jeta është më e lirë, një person me tё ardhura mesatare mund të jetojë rehat.
Ndërsa në shtete me kosto të lartë jetese, mund të nevojitet dyfishi i tё aardhurave.
Megjithatë, ekspertët theksojnë se paga e lartë nuk mjafton. Po aq i rëndësishëm është krijimi i një fondi emergjence që mbulon shpenzimet e tre deri në gjashtë muajve. Ky fond shërben si mbrojtje në rast humbjeje të papritur të punës, problemesh shëndetësore apo situatash të tjera që kërkojnë shpenzime të menjëhershme.
Por një nga gjetjet më befasuese është se edhe të ardhurat shumë të larta nuk garantojnë qetësi financiare.
Sipas një sondazhi të kompanisë financiare Goldman Sachs, të publikuar në shtator, rreth 25% e personave që fitojnë nga 200,000 deri në 300,000 dollarë në vit jetojnë duke pritur pagën e radhës për të mbuluar shpenzimet.
Për ata që fitojnë nga 300,000 deri në 500,000 dollarë në vit, kjo përqindje kalon 30%.
Ekspertët paralajmërojnë se shenjat e pasigurisë financiare shfaqen kur një shpenzim i papritur, qoftë edhe prej 100 dollarësh, shkakton panik, kur njerëzit përdorin pagesat me këste për të blerë ushqime ose kur kanë frikë të kontrollojnë gjendjen e llogarisë bankare.
Përfundimi i ekspertëve është se rehatia financiare nuk përcaktohet vetëm nga sa para fiton, por edhe nga sa arrin të kursesh dhe sa kontroll ke mbi shpenzimet.
Siguria e vërtetë financiare fillon atëherë kur një faturë e papritur nuk e kthen më jetën e përditshme në një burim ankthi.
Burimi: The Independent
