Shtetet e Bashkuara u kanë bërë thirrje urgjente qytetarëve të tyre që ndodhen në Venezuelë të largohen menjëherë nga vendi, mes raportimeve shqetësuese për grupe të armatosura paraushtarake që po gjёmojnё amerikanët qё gjejnё në rrugë.
Në një alarm sigurie të publikuar nga Departamenti i Shtetit, thuhet se milicitë pro-regjimit, të njohura si colectivos, kanë ngritur postblloqe në disa zona dhe po ndalojnë automjete për të kontrolluar nëse pasagjerët janë qytetarë amerikanë apo të lidhur me SHBA-të.
“Qytetarët amerikanë në Venezuelë duhet të qëndrojnë vigjilentë dhe të tregojnë kujdes ekstrem gjatë udhëtimeve tokësore,” thuhet në njoftim, duke u kërkuar atyre të përfitojnë nga rifillimi i disa fluturimeve ndërkombëtare për t’u larguar sa më shpejt.
Situata mbetet e paqëndrueshme vetëm një javë pas operacionit ushtarak amerikan në Karakas, ku u rrëzua presidenti Nicolás Maduro dhe gjatë të cilit pati viktima. Raportime nga gazetarë dhe aktivistë lokalë flasin për persona të armatosur që patrullojnë kryeqytetin me motoçikleta dhe vendosin pika kontrolli në rrugët kryesore.
Ndërkohë, rrugët që lidhin Karakasin me kufirin perëndimor janë nën mbikëqyrje të shtuar nga forca ushtarake dhe policore.
Zyrtarë të Departamentit të Shtetit kanë zhvilluar së fundmi një vizitë në Karakas, në atë që konsiderohet përgatitje për rihapjen e Ambasadës Amerikane. Presidentja në detyrë, Delcy Rodríguez, ka shprehur publikisht dëshirën për të përmirësuar marrëdhëniet me Uashingtonin, pavarësisht tensioneve të forta pas rrëzimit të aleatit të saj politik.
Situata në terren mbetet e tensionuar, ndërsa SHBA vijon të paralajmërojnë se siguria e qytetarëve të tyre nuk mund të garantohet.
(Burimi: The Guardian)
