Një stuhi e fuqishme dimërore pritet të godasë verilindjen e Shteteve të Bashkuara në orët në vijim, me reshje që në disa zona mund të arrijnë deri në 60 centimetra borë dhe erëra të forta që krijojnë kushte të plota stuhie bore. Meteorologët e cilësojnë sistemin si një “bombë ciklonike”, një fenomen që forcohet shumë shpejt dhe sjell reshje intensive e dëme të mundshme.
Mbi 35 milionë banorë janë nën kërcënimin e kushteve ekstreme, ndërsa udhëtimi gjatë natës së tё dielёs dhe në orët e para të së hënës konsiderohet praktikisht i pamundur për shkak të shikueshmërisë shumë të ulët dhe rrugëve të mbuluara nga bora. Sipas të dhënave të fundit, më shumë se 7 mijë fluturime janë anuluar në mbarë vendin.
Në Nju Jork është shpallur gjendja e jashtëzakonshme dhe ndalim qarkullimi duke nisur nga ora 21:00 e së dielës deri në mesditën e së hënës. Kryetari i bashkisë u bëri thirrje qytetarëve të shmangin çdo lëvizje të panevojshme, në mënyrë që rrugët të mbeten të lira për mjetet e emergjencës dhe pastrimit të borës. Të gjitha shkollat publike do të qëndrojnë të mbyllura të hënën, ndërsa janë pezulluar edhe shërbime të tjera jo thelbësore, përfshirë bibliotekat dhe disa linja tragetesh.
Edhe Bostoni ka shpallur emergjencë bore, me ndalim parkimi në rrugët kryesore dhe mbyllje të shkollave. Qindra mjete për shpërndarjen e kripës dhe pastrimin e borës janë angazhuar për të mbajtur të kalueshme akset kryesore.
Parashikimet tregojnë se Filadelfia, Nju Jorku, Bostoni dhe zona të tjera përgjatë korridorit I-95 do tё preken mё shumё nga bora. Meteorologët paralajmërojnë gjithashtu për mundësinë e “borës me bubullimë”, një fenomen i rrallë ku reshjet e dendura shoqërohen me vetëtima dhe gjëmime të zbutura nga bora.
Stuhia konsiderohet si një nga më të fuqishmet e viteve të fundit në rajon dhe mund të lërë pasoja të ndjeshme në transport, energji dhe jetën e përditshme, ndërsa autoritetet vijojnë përgatitjet për përballimin e saj.
