Shqipëria është renditur nga e përditshmja britanike The Independent mes 10 destinacioneve europiane që po fitojnë popullaritet këtë verë, pasi nuk preket nga Sistemi i ri Evropian i Hyrje-Daljes (EES), i cili ka shkaktuar radhë të gjata në disa pika kufitare të vendeve të zonës Schengen.
Sipas medias britanike, sistemi i ri biometrik i Bashkimit Evropian, që kërkon regjistrimin e gjurmëve të gishtërinjve dhe fotografimin e udhëtarëve në hyrjen e parë në zonën Schengen, ka sjellë vonesa të konsiderueshme në disa kufij. Për këtë arsye, gjithnjë e më shumë turistë po orientohen drejt vendeve që nuk e zbatojnë këtë sistem.
Në listën e publikuar nga The Independent, Shqipëria përshkruhet si një nga alternativat më tërheqëse dhe më ekonomike ndaj destinacioneve tradicionale si Greqia apo Kroacia. Gazeta vlerëson veçanërisht Rivierën Shqiptare, duke përmendur plazhet e Ksamilit dhe Himarës, të cilat krahasohen për ujërat e kristalta dhe rërën e bardhë me peizazhe tropikale.
Artikulli thekson se Shqipëria nuk ofron vetëm turizëm bregdetar. Vizitorëve u sugjerohen edhe Alpet Shqiptare, shtegu i Valbonës, si dhe Tirana, e cila përshkruhet si një destinacion urban me arkitekturë që ndërthur trashëgiminë osmane, periudhën komuniste dhe ndërtesat moderne.
Përveç Shqipërisë, në listën e vendeve europiane që nuk preken nga sistemi EES përfshihen edhe Qiproja, Irlanda, Bosnje-Hercegovina, Maqedonia e Veriut, Moldavia, Mali i Zi, Kosova, Serbia dhe Mbretëria e Bashkuar.
