Situata në qytetin Niscemi, në jug të Siçilisë, është dramatike pas një rrëshqitjeje masive dheu që ka shembur një pjesë të madhe të shpatit ku ngrihet qyteti, duke lënë dhjetëra banesa të varura në buzë të një shkëmbi. Autoritetet kanë evakuuar deri tani rreth 1,500 banorë, ndërsa humnera vazhdon të zgjerohet dhe rrezikon të përfshijë edhe qendrën historike.
“Situata është e tmerrshme. Nuk dua që askush ta marrë lehtë këtë ngjarje,” deklaroi kryebashkiaku Massimiliano Conti, duke u bërë thirrje banorëve jashtë zonës së rrethuar të qëndrojnë në shtëpi. Ai konfirmoi se deri më tani nuk ka persona të lënduar, por vetëm dëme të shumta materiale në banesa.
Pamjet ajrore dhe videot nga zona tregojnë shtëpi të vendosura në mënyrë të rrezikshme në prag të shembjes. Drejtori i Mbrojtjes Civile të Siçilisë, Salvatore Cocina, paralajmëroi se të gjitha shtëpitë brenda një rrezeje prej 50 deri në 70 metrash do të shemben.
Shkollat në qytet mbeten të mbyllura, ndërsa rruga që lidh Niscemin me qytetin bregdetar të Gelës është bllokuar. Qyteti ka rreth 25 mijë banorë. Një pjesë e të evakuuarve janë strehuar tek familjarët, ndërsa qindra të tjerë kanë kaluar dy netët e fundit në një arenë sportive lokale.
Në një intervistë për “La Repubblica”, kryebashkiaku Conti pranoi se frika është e pranishme: “Nuk ka dyshim – jemi të frikësuar. Rrëshqitjet e dheut ranë edhe 10 metra të tjera mëngjesin e sotëm. Nga pamjet ajrore ishte tronditëse të shihje Niscemin tonë duke u shembur.”
Ai shtoi se qyteti rrezikon të izolohet plotësisht, ndërsa situata monitorohet pa ndërprerje, pasi mund të ndryshojë në çdo moment. Reshjet e pandërprera po e vështirësojnë ndërhyrjen e ekipeve të ndihmës dhe studimet teknike në terren.
Qeveria italiane shpalli gjendje të jashtëzakonshme për rajonet jugore të goditura nga cikloni Harry javën e kaluar. Stuhia solli shira intensive dhe dallgë deri në 9 metra të larta, duke shkaktuar dëme të mëdha në Siçili, Kalabri dhe Sardenjë. Janë shkatërruar rrugë, mbrojtje bregdetare dhe vendpushime turistike.
Kostoja paraprake e dëmeve vlerësohet mbi 1 miliard euro. Qeveria ka ndarë fillimisht 100 milionë euro për të përballuar nevojat emergjente. Ministri i Mbrojtjes Civile, Nello Musumeci, njoftoi se në ditët në vijim do të miratohet një plan ndërministror për restaurimin dhe rindërtimin e infrastrukturës së dëmtuar.
Vetëm në Siçili dëmet llogariten rreth 740 milionë euro, ndërsa presidenti i rajonit, Renato Schifani, paralajmëroi se shifra përfundimtare mund të dyfishohet.
(Burimi: Tgcom)
