Katër efektivë të policisë venezueliane janë arrestuar dhe rrezikojnë përjashtimin nga detyra pasi akuzohen se kanë grabitur para nga rrënojat e një ndërtese të shembur gjatë tërmeteve shkatërruese që goditën vendin javën e kaluar.
Ngjarja ka shtuar edhe më shumë zemërimin e qytetarëve ndaj autoriteteve, ndërsa ekipet vendase dhe ndërkombëtare të shpëtimit vijojnë kërkimet për të mbijetuar në një nga katastrofat më të rënda natyrore në historinë e Amerikës Latine.
Sipas bilancit të deritanishëm, tërmetet me magnitudë 7.2 dhe 7.5 kanë shkaktuar afro 2.000 viktima, mbi 10.000 të plagosur dhe dhjetëra mijëra persona rezultojnë ende të zhdukur.
Pamje të publikuara në rrjetet sociale tregojnë banorë të revoltuar që përpiqen të ndalojnë efektivët e Trupës së Hetimeve Shkencore, Penale dhe Kriminalistike (CICPC), të cilët dyshohet se po nxirrnin një kasafortë me dollarë nga rrënojat e një ndërtese në shtetin La Guaira, zona më e goditur nga katastrofa.
Në një deklaratë zyrtare, CICPC konfirmoi arrestimin e katër efektivëve dhe njoftoi se ka nisur procedurat disiplinore për largimin e tyre të menjëhershëm nga policia.
“Sipas verifikimeve tona, një grup punonjësish, duke devijuar nga detyrat e tyre dhe duke përfituar nga operacionet e shpëtimit dhe ndihmës humanitare, kanë përvetësuar sende me vlerë të gjetura mes rrënojave. Ky veprim është i papranueshëm dhe dëmton rëndë prestigjin e institucionit”, thuhet në deklaratë.
Ndërkohë, shpresat për të gjetur të mbijetuar po zbehen. Të martën, një djalë trevjeçar u nxor i gjallë nga rrënojat në La Guaira, por ekipet e kërkim-shpëtimit pranojnë se me kalimin e ditëve mundësitë për mrekulli po pakësohen.
Paralelisht po rritet pakënaqësia e popullsisë për ritmin e ngadaltë të operacioneve shtetërore të shpëtimit dhe për sjelljen e disa pjesëtarëve të ushtrisë dhe policisë.
Qindra vullnetarë vazhdojnë të mbërrijnë çdo ditë në La Guaira për të ndihmuar në kërkimet, shpesh të pajisur vetëm me lopata, litarë dhe duart e tyre.
“Duam të bëjmë gjithçka që mundemi për të ndihmuar”, tha Fabiano Nadales, 35 vjeç, i cili udhëtoi nga qyteti Valencia së bashku me një grup studentësh të mjekësisë dhe vullnetarësh.
Ai shprehet ende optimist se mund të gjenden të mbijetuar të tjerë.
“Mrekullitë ndodhin. Ka njerëz që mund të mbijetojnë edhe 10 ditë nën rrënoja”, tha ai.
Edhe studentja e mjekësisë Estefania Callejas deklaroi se situata është tepër e vështirë.
“Po përpiqemi vetëm të ndihmojmë. Ka mijëra të plagosur që kanë nevojë për kujdes mjekësor”, tha ajo.
Nga ana tjetër, qeveria venezueliane ka hedhur poshtë akuzat për neglizhencë, duke pretenduar se zemërimi i qytetarëve dhe raportimet për grabitje nga forcat e sigurisë janë rezultat i “dezinformatave” që qarkullojnë në rrjetet sociale.
Megjithatë, shumë nga vullnetarët thonë se në terren shohin shumë më tepër zjarrfikës dhe ekipe ndërkombëtare shpëtimi sesa prani të strukturave shtetërore.
“Sheh zjarrfikësit dhe ekipin meksikan ‘Los Topos’, por nuk sheh shtetin”, deklaroi mësuesi Alexander Delgado, i cili prej pesë ditësh po punon për largimin e rrënojave.
Edhe veterineri Mijaed Díaz kërkoi një angazhim shumë më të madh nga autoritetet.
“Do të doja të shihja më shumë institucione publike këtu. Në fund, ne jemi mësuar të bëjmë gjithçka pothuajse pa asnjë mbështetje”, u shpreh ai.
Situata mbetet dramatike edhe në qendrat e emergjencës.
Daniela Armas, e strehuar në një kamp në La Guaira, tha se shpërndarja e ndihmave shpesh degjeneron në përleshje.
“Njerëzit pothuajse vriten me njëri-tjetrin për një pako ushqimore. Është si një luftë gjelash”, tregoi ajo.
Zemërimi u shtua edhe më shumë pasi qeveria, pasi fillimisht falënderoi vullnetarët, vendosi të kufizojë hyrjen e civilëve në zonat e goditura.
Madje, një punonjës shtetëror në një postbllok në La Guaira deklaroi për agjencinë Reuters se kishte parë efektivë të policisë dhe ushtrisë që konfiskonin ndihmat humanitare nga kamionët dhe më pas mburreshin me atë që kishin përvetësuar.
Ndërkohë, presidentja në detyrë Delcy Rodríguez po përpiqet të përballojë krizën më të rëndë që nga marrja e pushtetit pas largimit të Nicolás Maduro në fillim të këtij viti.
Sipas analizave paraprake satelitore, mbi 58 mijë ndërtesa mund të jenë dëmtuar ose shkatërruar nga tërmetet e 24 qershorit, një shifër shumë më e lartë se vlerësimet zyrtare të autoriteteve venezueliane.
Operacionet e kërkim-shpëtimit vijojnë pa ndërprerje, ndërsa bilanci i viktimave pritet të rritet edhe më tej.
Burimi: The Guardian
