Një tjetër furtunë politike ka shpërthyer në Spanjë, pasi Njësia Qendrore Operative e Gardës Civile (UCO) ka bastisur selinë qendrore të Partisë Socialiste Spanjolle (PSOE) në Madrid, në kuadër të një hetimi të rëndë për një skemë të dyshuar që synonte destabilizimin e hetimeve gjyqësore kundër partisë dhe qeverisë së kryeministrit Pedro Sánchez.
Hetimi drejtohet nga gjyqtari i Gjykatës Kombëtare, Santiago Pedraz, i cili po heton një rrjet të dyshuar të lidhur me ish-militanten socialiste Leire Díez. Sipas burimeve gjyqësore, rrjeti dyshohet se kërkonte informacione komprometuese mbi gjyqtarë, prokurorë dhe anëtarë të forcave të sigurisë, me qëllim pengimin apo minimin e procedimeve penale që prekën Partinё Socialiste dhe qeverinë spanjolle.
Agjentët e UCO-s kanë hyrë në selinë e Partisё Socialiste për të sekuestruar dokumente dhe fatura që dyshohet se janë përdorur për të justifikuar pagesa ndaj personave të përfshirë në skemë. Sipas hetuesve, këto pagesa mund të jenë përdorur për sigurimin e informacionit sensitiv mbi hetimet policore dhe gjyqësore në zhvillim kundër figurave të lidhura me partinë në pushtet.
Në kuadër të çështjes, gjyqtari Pedraz ka marrë të pandehur disa ish-zyrtarë të lartë socialistë, mes tyre Santos Cerdán, ish-sekretar organizativ i PSOE-s, ish-këshilltarin andaluzian Gaspar Zarrías, biznesmenin Javier Pérez Dolset dhe avokatin Ismael Oliver. Po ashtu, nën hetim është vendosur edhe administratorja aktuale e PSOE-s, Ana Fuentes.
Ata akuzohen për një sërë veprash të rënda penale, përfshirë organizatë kriminale, korrupsion, zbulim sekretesh, falsifikim dokumentesh tregtare, trafik influence, shpërdorim detyre dhe vepra kundër institucioneve të shtetit. Sipas gjykatës, ekzistojnë dyshime se disa prej të përfshirëve kanë bashkëpunuar për të manipuluar apo sabotuar hetime sensitive që prekën qeverinë dhe strukturat e partisё.
Hetimi është zgjeruar edhe ndaj avokatit personal të Santos Cerdán dhe një oficeri të Gardës Civile, ndërsa kontrolle janë ushtruar jo vetëm në selinë e partisë, por edhe në banesat e disa prej personave të përfshirë dhe në struktura të tjera shtetërore në Madrid. Gjykata ka argumentuar se masat janë të nevojshme për shkak të “seriozitetit të veprave penale” dhe “shumave të konsiderueshme financiare” që po hetohen.
Në reagimin e saj publik, Leire Díez ka mohuar kategorikisht të ketë marrë pagesa nga PSOE apo të jetë pjesë e ndonjë skeme të paligjshme. Në një intervistë për Catalunya Ràdio, ajo deklaroi se kishte vënë në dispozicion të gjitha llogaritë e saj financiare dhe se ndihej “plotësisht e qetë”. Ajo shtoi gjithashtu se nuk ka më lidhje me Partinë Socialiste dhe pretendoi se nuk di asgjë për zgjerimin e hetimeve të urdhëruara nga gjyqtari Pedraz.
Skandali konsiderohet si një nga goditjet më të forta politike për qeverinë e Pedro Sánchez në muajt e fundit dhe rrezikon të hapë një krizë të re institucionale në Spanjë.
