Prokurori i Gjykatës Penale Ndërkombëtare (ICC), Karim Khan, është pezulluar nga detyra pas hetimeve lidhur me akuzat për sjellje seksuale të papërshtatshme.
Vendimi u njoftua të hënën nga Byroja e Asamblesë së Shteteve Palë të Gjykatës Penale Ndërkombëtare, organi drejtues i institucionit, që bëri të ditur se Khan do t’i nënshtrohet procedurave disiplinore përpara 125 shteteve anëtare të Statutit të Romës.
Sipas deklaratës zyrtare, vendimi është bazuar në rezultatet e një hetimi të kryer nga Zyra e Kombeve të Bashkuara për Shërbimet e Mbikëqyrjes së Brendshme (OIOS), provat e mbledhura gjatë procesit, opinionin e një paneli të posaçëm ekspertësh gjyqësorë dhe parashtresat me shkrim të palëve të përfshira.
Megjithatë, raporti i plotë i hetimit nuk do të bëhet publik.
“Vendimi i Byrosë dhe dokumentacioni përkatës do të mbeten konfidencialë. Byroja vazhdon të kërkojë respektimin e privatësisë dhe të drejtave të të gjitha palëve të përfshira, si dhe ruajtjen e integritetit të procesit në vijim”, thuhet në deklaratë.
Një seancë e posaçme e Asamblesë së Shteteve Palë pritet të mblidhet sa më shpejt për të shqyrtuar çështjen.
Khan kishte marrë leje të përkohshme nga detyra në maj të vitit 2025, ndërsa zhvillohej hetimi i OKB-së.
Vetëm pak javë më parë, ai kishte deklaruar publikisht se ishte “shfajësuar” nga akuzat.
Në një intervistë për median Zeteo, Khan tha se hetimi nuk kishte gjetur asnjë provë për “sjellje të papërshtatshme apo abuzim me autoritetin” dhe se duhej të rikthehej në detyrë.
“Kam lexuar raportin e OKB-së. Kam lexuar gjetjet e gjyqtarëve. Raporti përmban 137 konkluzione dhe asnjë prej tyre nuk përshkruan sjellje që mund të konsiderohet e papërshtatshme në çfarëdo forme”, deklaroi ai.
Edhe në mars të këtij viti, një panel prej tre gjyqtarësh kishte arritur unanimisht në përfundimin se rezultatet e hetimit të OKB-së “nuk provojnë sjellje të pahijshme apo shkelje të detyrës sipas kuadrit ligjor përkatës”.
Hetimi u urdhërua në nëntor 2024 pasi një punonjëse e zyrës së prokurorit e akuzoi Khan për sjellje seksuale të papërshtatshme.
Në gusht të vitit të kaluar, një grua e dytë doli publikisht me pretendime se prokurori kishte abuzuar me pozitën e tij gjatë kohës që ajo punonte nën drejtimin e tij.
Akuzat ndaj Khan erdhën në një moment tepër delikat për Gjykatën Penale Ndërkombëtare, ndërsa zyra e tij po hetonte pretendimet për krime lufte dhe genocid nga zyrtarë dhe forca izraelite në Gaza dhe territoret e pushtuara palestineze.
Në maj 2024, Khan njoftoi se do të kërkonte lëshimin e urdhër-arresteve për kryeministrin izraelit Benjamin Netanyahu dhe ish-ministrin e Mbrojtjes Yoav Gallant, duke i akuzuar për përgjegjësi të mundshme penale lidhur me krime lufte dhe krime kundër njerëzimit në Gaza.
