Një sulm i dyshuar terrorist është parandaluar në Paris, ku policia franceze arrestoi një person që po përgatitej të aktivizonte një pajisje shpërthyese pranë një dege të Bankës Amerikane.
Ngjarja ndodhi rreth orës 03:30 të mëngjesit në zonën prestigjioze të rrethit të 8-të, pranë Champs-Elysees. Sipas burimeve hetimore, i dyshuari u ndalua në momentin që kishte vendosur një pajisje artizanale të përbërë nga rreth 5 litra lëndë e dyshuar si karburant dhe një sistem ndezjeje.
Prokuroria Kundër Terrorizmit në Francë ka marrë në dorë hetimet, duke e cilësuar rastin si “komplot kriminal terrorist” dhe “tentativë për shkatërrim me mjete të rrezikshme”.
Në hetim janë përfshirë edhe policia gjyqësore e Parisit dhe shërbimi i inteligjencës së brendshme DGSI, ndërsa pajisja shpërthyese është neutralizuar dhe i është dorëzuar ekspertëve kriminalistikë.
Ministri i Brendshëm francez, Laurent Nunez, përgëzoi reagimin e shpejtë të forcave të sigurisë, duke theksuar se vigjilenca mbetet në nivel maksimal në kontekstin aktual ndërkombëtar.
Ndërkohë, sipas mediave franceze, një person i dytë që ndodhej në vendngjarje është larguar dhe vijon të jetë në kërkim.
Autoritetet nuk kanë dhënë ende detaje të mëtejshme mbi motivet apo lidhjet e mundshme të të dyshuarit, ndërsa hetimet vijojnë për të zbardhur plotësisht këtë ngjarje që mund të kishte pasoja të rënda.
(Burimi: France 24 / AFP / Reuters)
