Filmi “Tana”, kujtohet si një nga momentet më të rëndësishme të historisë së kinematografisë shqiptare. Me skenar të Fatmir Gjatës dhe regji të Kristaq Dhamos, “Tana” ishte filmi i parë artistik me metrazh të gjatë i realizuar në Shqipëri. Po ashtu, ai hyri në histori edhe për faktin se përmbante puthjen e parë të shfaqur ndonjëherë në një film shqiptar.
Në qendër të ngjarjes është Tana, një vajzë e zgjuar dhe me ide përparimtare, e cila bie në dashuri me Stefanin, një djalë nga një fshat i varfër malor. Dashuria e tyre përballet me pengesa të shumta, si mentaliteti konservator i gjyshit të Tanës dhe xhelozia e Lefterit. Historia zhvillohet në vitet 1950 dhe trajton jetën shoqërore në fshat, duke u mbështetur në novelën me të njëjtin titull të Fatmir Gjatës.
Rolet kryesore u interpretuan nga Tinka Kurti dhe Naim Frashëri. Në një intervistë të dhënë vite më vonë, Tinka Kurti tregoi se nuk pati hezitim për të realizuar puthjen historike me partnerin e saj në film, edhe pse në atë kohë skena të tilla konsideroheshin tabu. Ajo e cilësoi këtë moment si një krenari në karrierën e saj artistike.
Aktorja ka rrëfyer gjithashtu se xhirimi i asaj skene nuk ishte aspak i lehtë. Sipas saj, u deshën plot 29 dubla për ta realizuar, por më pas puthja u hoq nga versioni përfundimtar i filmit, gjë që ajo e ka konsideruar gjithmonë një zhgënjim.
Në “Tana” morën pjesë edhe shumë emra që më vonë u kthyen në ikonat e kinemasë shqiptare, si Pjetër Gjoka, Kadri Roshi, Marie Logoreci, Violeta Manushi, Pandi Raidhi, Lazër Vlashi dhe Ilia Shyti. Arkivi Qendror Shtetëror i Filmit ka njoftuar se do të vazhdojë të sjellë materiale dhe informacione për këtë film dhe për kontributin e regjisorit të njohur Kristaq Dhamo.
