Një i ri rreth të njëzetave është qëlluar për vdekje nga forcat e rendit pasi hyri në perimetrin e sigurisё së resortit Mar-a-Lago në Palm Beach, Florida, pronë e presidentit amerikan Donald Trump.
Sipas njoftimit të Shërbimit Sekret të SHBA-së, ngjarja ka ndodhur rreth orës 01:30 të mëngjesit të së dielës. I riu është vërejtur pranë portës veriore të kompleksit duke mbajtur atë që dukej si një armë gjahu dhe një bidon me lëndë djegëse. Autoritetet thanë se ai kishte hyrë në zonën e sigurisë në momentin kur një automjet tjetër po dilte nga porta.
Në vendngjarje kanë ndërhyrë dy agjentë të Shërbimit Sekret dhe një efektiv i Zyrës së Sherifit të Qarkut Palm Beach. Sipas sherifit Rick Bradshaw, i riu është urdhëruar të hidhte armën dhe bidonin. Ai ka vendosur në tokë bidonin me karburant, por ka ngritur armën në pozicion qitjeje. Në atë moment, oficerët kanë hapur zjarr, duke e neutralizuar.
Emri i viktimës nuk është bërë publik. Zëdhënësi i Shërbimit Sekret, Anthony Guglielmi, tha se i riu ishte nga Karolina e Veriut dhe ishte raportuar i zhdukur nga familja disa ditë më parë. Hetuesit dyshojnë se ai ishte nisur drejt Floridës dhe kishte marrë armën gjatë rrugës. Në automjetin e tij është gjetur edhe kutia e armës.
Presidenti Donald Trump nuk ndodhej në Mar-a-Lago në momentin e incidentit. Ai ishte në Shtëpinë e Bardhë, ku kishte pritur guvernatorë shtetesh një natë më parë. Edhe Zonja e Parë ndodhej në Uashington.
Hetimet po kryhen nga Shërbimi Sekret, FBI-ja dhe Zyra e Sherifit të Palm Beach. Autoritetet po punojnë për të përcaktuar motivin e ngjarjes dhe për të ndërtuar një profil psikologjik të të riut. Deri tani nuk ka informacion nëse ai kishte probleme të mëparshme me ligjin.
