Për shumë analistë, figura e Ali Larijanit, i vrarë nga forcat e SHBA-Izrael më 17 mars të këtij viti, ishte e pazëvendësueshme.
Por Irani nuk humbet kohë. Raportohet emërimi i zëvendësuesit. Mohammad Bagher Zolghadr do të jetë nga sot sekretari i ri i Këshillit të Lartë të Sigurisë Kombëtare.
Mozaiku horizontal qeverisës i jep avantazh të gjerë në kohë dhe hapësirë Iranit të mbyllë shpejt “hemorragjitë” që vijnë nga vrasjet e njëpasnjëshme të udhëheqësve të saj politikë dhe ushtarakë.
Tё paktёn 10 të vrarë nga bashkëpunimi Mossad-CIA që nga fillimi i luftës, janë një shifër sinjifikative për të kuptuar jo vetëm suksesin e shërbimit sekret izraelito-amerikan, por edhe të kundërtën: sa më shumë “koka” eliminon, aq të tjera ndoshta më të egra dalin…
Zgjedhja e Bagher-it duket si një lëvizje në linjën e ashpër të udhëheqjes së Iranit.
Pas një karriere të gjatë, në vitin 2007, Zolghadr u emërua zëvendësshef i Shtabit të Përgjithshëm të Forcave të Armatosura të Iranit për çështjet që lidhen me Basij, një strukturë paramilitare e rëndësishme në arkitekturën e sigurisë së regjimit.
Ai iu bashkua Organizatës së Mojahedinëve të Revolucionit Islamik dhe i përkiste krahut të djathtë të saj, ndërsa më parë kishte qenë pjesë e organizatës guerile Mansouroun, së bashku me figura që më vonë u bënë emra të rëndësishëm të Gardës Revolucionare si Rezaei, Shamkhani dhe Rashid. Gjithashtu, ai konsiderohet si një nga themeluesit e Ansar – e Hezbollahut, një grup me linjë të fortë ideologjike brenda sistemit iranian.
Në vitin 2012, Zolghadr u emërua zëvendëskryetar i Gjyqësorit për çështjet strategjike, pasi më parë kishte shërbyer si këshilltar i kreut të drejtësisë, Sadeq Larijani. Kjo përvojë e vendos atë në një pozicion kyç që lidh sigurinë, ushtrinë dhe sistemin gjyqësor të Iranit.
Në planin personal, ai është i martuar me Sedigheh Begum Hejazi, e cila ka mbajtur postin e Drejtoreshës së Përgjithshme të Zyrës për Gratë dhe Çështjet Familjare në Organizatën e Kulturës dhe Komunikimit Islamik. Dhëndri i tij, Kazem Gharibabadi, është një diplomat i njohur iranian që ka përfaqësuar vendin në Vjenë pranë organizatave ndërkombëtare, përfshirë Agjencinë Ndërkombëtare të Energjisë Atomike.
Në dy ditët e fundit po kërkohet një “negociator” që nuk ka “vdekur” dhe është i pranueshëm nga pala amerikane në bisedime të mundshme me Iranin.
A do të jetë Mohammad Bagher Zolghadr – negociatori i ardhshëm i paqes?
