Valentin Vacherot e shkroi një nga historitë më të pabesueshme të tenisit modern, duke u ngjitur nga kualifikimet e Shanghai Masters deri në majën e podiumit. Tenisti francez, i renditur në vendin e 204 në botë, fitoi turneun e parë të madh në karrierën e tij – dhe e bëri këtë në mënyrën më dramatike të mundshme.
Pas një rrugëtimi të jashtëzakonshëm, Vacherot eliminoi katër kundërshtarë shumë më të renditur se ai, përfshirë yllin danez Holger Rune (nr. 11 në botë) në çerekfinale. Por surpriza më e madhe erdhi në gjysmëfinale, ku ai mposhti legjendën Novak Djokovic me rezultatin 6-3, 6-4, duke siguruar një vend në finalen e ëndrrave – përballë kushëririt të tij, Arthur Rinderknech.
Në një duel familjar që hyri në histori, Vacherot triumfoi 4-6, 6-3, 6-3, duke u bërë lojtari me renditjen më të ulët që ka fituar ndonjëherë një titull Masters 1000. Ishte gjithashtu hera e parë që dy kushërinj përballeshin në një finale të tillë dhe hera e parë që anëtarë të së njëjtës familje takoheshin në një finale që prej vitit 1991, kur John McEnroe mposhti vëllain e tij Patrick në Chicago Open.
“Gjyshja dhe gjyshi do të ishin krenarë,” shkroi Vacherot pas fitores, në një moment të mbushur me emocione.
Të dy kushërinjtë, që dikur luanin bashkë tenis në universitetin Texas A&M, mezi mbanin lotët gjatë intervistës pas ndeshjes.
“Është e pabesueshme ajo që ndodhi. Nuk e di çfarë po ndodh. As në ëndërr nuk do ta kisha imagjinuar këtë,” tha Vacherot për ATP Tour. “Jam thjesht i lumtur për performancën time gjatë këtyre dy javëve. Ka një humbës në fushë, por sot kemi dy fitues – një familje dhe një histori e jashtëzakonshme për sportin.”
Rinderknech, më i favorizuar në letër dhe i renditur i 54-ti në botë, fitoi bindshëm setin e parë me 12 “winner”-a dhe vetëm dy gabime të paforcuara. Por më pas Vacherot reagoi fuqishëm, duke barazuar ndeshjen për të ngritur trofeun në setin vendimtar.
Para këtij turneu, Vacherot kishte vetëm një fitore në nivel ATP dhe një total prej 594,077 dollarësh në karrierë. Tani, me këtë sukses monumental, ai pritet të ngjitet mes 50 më të mirëve në botë dhe të fitojë 1,124,380 dollarë nga turneu i Shangait.
Rinderknech, megjithëse i zhgënjyer nga humbja, u shpreh krenar për kushëririn e tij:
“Valentin, të dua shumë. Dhe jam shumë i lumtur për ty. Dhurove gjithçka sot. Shpresoj të kemi edhe shumë momente të tjera si ky,” tha ai pas finales.
Një përrallë moderne tenisi – dhe një fitore që do të kujtohet gjatë, jo vetëm për një triumf të papritur, por për mënyrën se si dashuria dhe rivaliteti familjar u shndërruan në magji sportive në Shangai.
(Burimi: CNN)
