Për të tretën ditë radhazi, qindra të rinj dhe qytetarë janë mbledhur në zemër të Tiranës dhe vijojnë të qëndrojnë aty për mbi 3 orë rradhazi, për të kundërshtuar projektin e ndërtimit në zonën e mbrojtur të Zvërnecit, në një protestë që po merr përmasa gjithnjë e më të mëdha dhe po shndërrohet në një lëvizje më të gjerë kundër asaj që zëra mes protestës e quajnë “shitja e pasurive publike”.
Nën sloganin “Shqipëria nuk është në shitje”, protestuesit janë mbledhur para Kryeministrisë, duke mbushur bulevardin me pankarta, flamuj kombëtarë dhe thirrje kundër projektit që parashikohet të zhvillohet në një nga zonat më të njohura natyrore të vendit.
Herë pas here turma shpërthen në duartrokitje, ndërsa dëgjohen thirrje të forta kundër ndërtimeve në territoret e mbrojtura dhe kundër, sipas tyre, dhënies së pronave publike në favor të interesave private.
Atmosfera vijon e ngarkuar me emocione, por njëkohësisht paqësore. Shumë prej pjesëmarrësve janë të rinj, studentë dhe aktivistë, të cilët e konsiderojnë mbrojtjen e Zvërnecit si simbol të një beteje më të madhe për mbrojtjen e hapësirave publike dhe trashëgimisë natyrore të vendit.
Gjatë tubimit përsëritet vazhdimisht një mesazh që tashmë duket se po kthehet në moton e protestës: “Nesër më shumë”. Thirrja është shoqëruar me duartrokitje të gjata dhe me ftesa drejtuar qytetarëve që t’i bashkohen protestës në ditët në vijim.
