Panorama urbane e Tiranës pritet të ndryshojë sërish. Nëse deri më sot kulla pranë stadiumit Air Albania konsiderohej një nga piketat më të spikatura të horizontit të kryeqytetit, shumë shpejt ajo mund të duket si një “vëlla i vogël” përballë projektit të ri që do të ngrihet pranë Pallatit të Kongreseve.
Korporata Shqiptare e Investimeve shpalli sot fituesin e konkursit ndërkombëtar për rikualifikimin e Pallatit të Kongreseve, ku triumfoi studioja prestigjioze zvicerane Herzog & de Meuron, një nga emrat më të njohur të arkitekturës botërore.
Por më shumë sesa rikonstruksioni i godinës ekzistuese, vëmendjen e ka tërhequr elementi më “spektakolar” i projektit: ndërtimi i një kulle multifunksionale me hotel dhe zyra, e cila pritet të ndryshojë ndjeshëm siluetën e qendrës së Tiranës.
Nga vizualizimet e para të publikuara, duket qartë se kulla e re do të dominojë jo vetëm kompleksin e Pallatit të Kongreseve, por edhe të gjithë aksin urban që shtrihet nga stadiumi Air Albania deri te ABA Center.
Në krahasim me masën volumetrike të projektit të ri, kulla e Air Albania-s apo ABA Busniess Center do ngjajnë dukshëm më modeste, duke humbur rolin dominues që kanë pasur deri më sot.
Kulla e re justifikohet me faktin se kombinon ruajtjen e karakterit historik të Pallatit të Kongreseve me zhvillimin e një kompleksi të ri urban. Ndёrsa ndërhyrja mbi godinën ekzistuese do të jetë minimale, ajo do zbehet nёn hijёn e shumёkatёshit mё tё ri.
“Pallati i Kongreseve është një ndërtesë novatore për kohën kur është ndërtuar dhe mbart vlera historike që duhen respektuar,” deklaruan përfaqësuesit e ekipit fitues gjatë prezantimit.
Brenda Pallatit të Kongreseve do të realizohen ndërhyrje por vetëm të karakterit teknik, për përmirësimin e akustikës, zëvendësimin e çatisë dhe krijimin e sallave të reja të konferencave.
Megjithatë, është kulla e re ajo që pritet të ngjallë debatet më të mëdha, nё shpёrpjestim tё dukshёm me hapësirat publike përreth.
