Gjykata e Lartë ka rrëzuar rekursin e paraqitur nga ish-presidenti Ilir Meta, duke i dhënë fund çdo përpjekjeje të tij për të lënë qelinë. Vendimi është marrë sot, në dhomë këshillimi, nga Kolegji Penal i përbërë nga gjyqtarët Ilir Panda, Albana Boksi dhe Medi Bici, të cilët kanë vendosur të mos pranojnë kërkesën e të pandehurit për zëvendësimin e masës së sigurisë “arrest me burg”.
Në këtë mënyrë, masa e caktuar më herët nga Gjykata e Posaçme e Apelit për Korrupsionin dhe Krimin e Organizuar mbetet në fuqi, ndërsa Meta do të vazhdojë të mbahet në paraburgim në pritje të gjykimit për akuzat e ngritura nga SPAK.
Burime pranë procesit sqarojnë se trupi gjykues nuk ka gjetur asnjë arsye ligjore për të ndryshuar vendimin e Apelit të Posaçëm, ndërsa arsyetimi pritet të publikohet në faqen zyrtare të Gjykatës së Lartë brenda tre ditëve.
Ish-presidenti, që ndodhet pas hekurave që prej 21 tetorit 2024, kishte pretenduar se nuk ekzistojnë më kushtet që justifikojnë mbajtjen e tij në burg, por gjyqtarët e lartë nuk e kanë parë kështu. Ata kanë vlerësuar se rreziku i ndikimit në hetime dhe ai i prishjes së provave mbetet ende i pranishëm, duke bërë që kërkesa e tij të refuzohet.
Ilir Meta akuzohet nga Prokuroria e Posaçme kundër Korrupsionit dhe Krimit të Organizuar (SPAK) për disa vepra të rënda penale, mes të cilave korrupsion pasiv, pastrim parash dhe fshehje pasurie. Sipas dosjes hetimore, ish-kreu i shtetit dyshohet se ka përfituar në mënyrë të kundërligjshme shuma të mëdha parash gjatë viteve të ushtrimit të funksioneve publike, ndërsa një pjesë e tyre dyshohet të jetë kanalizuar përmes rrjeteve financiare jashtë vendit.
Ky vendim i Gjykatës së Lartë vulos qëndrimin në burg të një prej figurave më të njohura të politikës shqiptare të tranzicionit, në një kohë kur hetimet e SPAK vijojnë për disa çështje të lidhura me pasurinë dhe aktivitetin e tij ekonomik.
