Shqipëria vijon të përballet me një situatë problematike nga zjarret, ndërsa temperaturat e larta dhe kushtet atmosferike po mbajnë të lartë rrezikun në disa zona të vendit.
Sipas Agjencisë Kombëtare të Mbrojtjes Civile, gjatë 24 orëve të fundit janë regjistruar 28 vatra zjarri, ndërsa pesë prej tyre vijojnë të jenë aktive.
Në terren janë angazhuar 631 forca operacionale, 64 mjete zjarrfikëse, 90 efektivë të Forcave të Armatosura, si dhe tre helikopterë dhe një avion “Air Tractor”, në përpjekje për të vënë flakët nën kontroll.
Aktualisht puna po vijon në Dajt, në Mallakastër dhe në disa zona të qarkut Elbasan. Në Mallakastër katër familje janë evakuuar përkohësisht për arsye sigurie, ndërsa autoritetet bëjnë të ditur se nuk ka rrezik të drejtpërdrejtë për zonat e tjera të banuara.
Ndërkohë, vatrat e zjarrit në Kostren (Berat), Pocest (Dibër) dhe në zonën Stegopull–Selckë–Levenishtë (Gjirokastër) janë shuar dhe mbeten nën monitorim.
Bilanci paraprak tregon se flakët kanë përfshirë rreth 34.5 hektarë me barishte, shkurre, pisha dhe pyll të përzier.
Agjencia Kombëtare e Mbrojtjes Civile paralajmëron se edhe gjatë ditës së sotme niveli i rrezikut nga zjarret mbetet i lartë në qarqet Lezhë, Durrës, Tiranë, Elbasan, Fier, Berat dhe Gjirokastër, duke u bërë thirrje qytetarëve të shmangin çdo veprim që mund të shkaktojë zjarr dhe të njoftojnë menjëherë autoritetet për çdo vatër të dyshimtë.
