Domatet po bëhen gjithnjë e më të shtrenjta edhe në Shtetet e Bashkuara, duke u kthyer në një nga produktet më të kushtueshme në treg, një situatë që po ndihet tashmë edhe në Shqipëri prej javësh.
Në SHBA, shkaku kryesor nuk është tregu lokal, por një kombinim faktorësh: moti ekstrem dhe rritja e kostove të prodhimit. Një valë e fortë të ftohti në Florida – një nga zonat kryesore të prodhimit – shkatërroi deri në 70% të të korrave, ndërsa në Meksikë reshjet e shumta dëmtuan ndjeshëm prodhimin.
Si pasojë, furnizimi është ulur ndjeshëm, ndërsa kërkesa po rritet me ardhjen e sezonit të ngrohtë.
Kjo ka sjellë një rritje të fortë të çmimeve: vetëm në mars, domatet u shtrenjtuan me mbi 15%, ndërsa krahasuar me një vit më parë, çmimi është rritur me më shumë se 20%. Në dyqane, ato po shiten në nivelet më të larta të viteve të fundit.
Situata rëndohet edhe më shumë nga rritja e çmimit të naftës dhe plehrave kimike, të cilat kanë pësuar rritje të forta për shkak të tensioneve globale dhe luftës në Lindjen e Mesme. Kjo e bën më të shtrenjtë si prodhimin, ashtu edhe transportin.
Edhe pse pritet që furnizimi të përmirësohet në javët në vijim, ekspertët paralajmërojnë se domatet do të mbeten një nga produktet që do të shtyjnë përpjetë çmimet e ushqimeve këtë sezon.
Me sa duket, rritja e çmimeve në Shqipëri nuk duket më një fenomen i izoluar, por pjesë e një tendence më të gjerë globale, ku edhe produktet më bazike po kthehen gradualisht në luks.
(Burimi: CNN)
