Një veprim i papërgjegjshëm i një turisteje ka shkaktuar dëme në një nga monumentet më të njohura të Italisë. Një grua 28-vjeçare është identifikuar nga autoritetet pasi u ngjit në Shatërvanin e Neptunit në Piazza della Signoria në Firence, duke shkaktuar dëme të vlerësuara rreth 5,000 euro.
Ngjarja ndodhi të shtunën e kaluar dhe, sipas hetimeve, ishte pjesë e një “sfide para dasmës”. Gruaja, e huaj, u ngjit mbi monument me qëllim që të prekte organet gjenitale tё statujës, duke e kthyer atë në një “shaka” që rezultoi e kushtueshme.
Ajo arriti të hyjë në zonën e shatërvanit duke kapërcyer kangjellat dhe buzën e pellgut, dhe për të mos rënë në ujë, u ngjit mbi strukturën skulpturore, duke shkaktuar dëmtime në disa pjesë të saj.
Policia bashkiake ndërhyri menjëherë, duke e ndaluar dhe larguar nga vendi i ngjarjes. Ndaj saj është ngritur akuzë për dëmtim të një monumenti artistik-arkitektonik.
Inspektimi i kryer nga specialistët e Fabbrica di Palazzo Vecchio konfirmoi dëme në disa elementë të shatërvanit, përfshirë pjesë të strukturës ku ajo ishte mbështetur dhe zonat ku ishte ngjitur.
Shatërvani, i njohur edhe si “Biancone”, është një vepër e rëndësishme e skulptorit Bartolomeo Ammannati dhe përbën një nga simbolet historike të qytetit të Firences.
(Burimi: ANSA)
