Ismail Kadare iku nga bota e të gjallëve, më 1 korrik 2024, në moshën 88 vjeç.
Dritëro Agolli u shua në 2017, në moshën 86-vjeçare.
Rexhep Qosja ndërroi jetë në moshën 89 vjeç, me një amanet që vetëm madhështorët mund ta lënë: më varrosni pa ceremoni, në heshtje!
Bota e letrave shqipe humbi një kolos që trondit themelet e kombit për vlerat dhe rëndësinë e tij.
Akademiku, eruditi, shkrimtari dhe publicisti Rexhep Qosja ikën për t’u futur në qetësinë e përtejme, ku me siguri edhe atje ka të rezervuar një vend të veçantë.
Në botën e zhurmshme shqiptare, kjo ikje do të shuhet shumë shpejt, ashtu si kolosët e ngjashëm me të, që do të jehojnë në shekujt që do të vijnë, por jo sot.
Ndërkohë, familja ka respektuar amanetin e tij, duke e përcjellë pa ceremoni dhe larg zhurmës, ashtu siç vetë Qosja kishte kërkuar – një largim në heshtje, në kontrast me madhështinë e jetës dhe veprës që la pas.
