Tifozët e futbollit që do të ndjekin ndeshjet e Kupës së Botës në SHBA këtë verë nuk do të përballen vetëm me bileta të shtrenjta – por edhe me kosto shumë të larta transporti.
Ata që udhëtojnë nga Nju Jorku drejt MetLife Stadium në New Jersey do të duhet të paguajnë rreth 150 dollarë për një biletë treni vajtje-ardhje për çdo ndeshje, konfirmuan zyrtarët e transportit.
Kjo është gati 12 herë më shumë se çmimi normal prej 12.90 dollarësh për një udhëtim prej vetëm 15 minutash nga Penn Station në Manhattan drejt stadiumit në East Rutherford.
Parkimi pranë stadiumit nuk do të jetë i disponueshëm për shumicën e tifozëve, ndaj autoritetet presin që rreth 40,000 persona për çdo ndeshje të përdorin transportin publik.
Stadiumi, i cili është shtëpia e ekipeve të NFL-së New York Giants dhe New York Jets, do të presë tetë ndeshje të Kupës së Botës, përfshirë edhe finalen më 19 korrik. Ndeshjet e fazës së grupeve nisin më 13 qershor, me ekipe të mëdha si Brazili, Franca, Gjermania dhe Anglia.
Zyrtarët e New Jersey thonë se rritja e çmimeve është e nevojshme për të mbuluar kostot e organizimit të turneut. Sipas drejtuesve të NJ Transit, do të shpenzohen rreth 62 milionë dollarë për transportin e tifozëve gjatë gjithë aktivitetit, ndërsa vetëm 14 milionë janë mbuluar nga fonde të jashtme.
“Ky nuk është abuzim me çmimet. Thjesht po përpiqemi të rikuperojmë kostot,” tha drejtori i NJ Transit, Kris Kolluri.
Nga ana tjetër, guvernatorja e New Jersey-t, Mikie Sherrill, i bëri thirrje FIFA-s që të mbulojë kostot e transportit. Ajo paralajmëroi se nuk do të lejojë që qytetarët e zakonshëm të subvencionojnë tifozët e Botërorit.
Çmime të larta transporti priten edhe në qytete të tjera. Në zonën e Bostonit, autobusët ekspres drejt Gillette Stadium do të kushtojnë 95 dollarë vajtje-ardhje, ndërsa biletat e trenit kanë arritur në 80 dollarë – katër herë më shumë se zakonisht.
Megjithatë, disa qytete pritëse kanë vendosur të mos rrisin çmimet. Në Los Angeles, një udhëtim do të kushtojë ende 1.75 dollarë, në Atlanta 2.50 dollarë, në Houston 1.25 dollarë dhe në Philadelphia 2.90 dollarë.
Nga ana e saj, FIFA ka reaguar duke thënë se nuk i takon asaj të paguajë transportin, duke kujtuar se marrëveshjet me qytetet pritëse parashikonin transport falas për tifozët.
Rritja e çmimeve ka shkaktuar reagime edhe nga politikanët. Guvernatorja e New York-ut, Kathy Hochul, e quajti “shumë të lartë” tarifën për një udhëtim kaq të shkurtër.
Ndërkohë, alternativat nuk janë më të lira: autobusët “shuttle” kushtojnë rreth 80 dollarë, ndërsa parkimi pranë stadiumit mund të arrijë deri në 225 dollarë.
Eksperienca e mëparshme tregon gjithashtu probleme logjistike. Gjatë Super Bowl-it të vitit 2014 në të njëjtin stadium, mijëra tifozë u përballën me pritje të gjata dhe platforma të mbipopulluara, duke ngritur shqetësime për menaxhimin e fluksit edhe gjatë Kupës së Botës.
