Brigitte Macron ka bërë një rrëfim të rrallë dhe emocional për jetën e saj në Pallatin Elize, duke pranuar se vitet si Zonja e Parë e Francës kanë qenë më të vështira sesa pritej.
Në një intervistë për La Tribune, bashkëshortja e presidentit Emmanuel Macron u shpreh se ndonjëherë ndihet “më e trishtuar se kurrë”, duke reflektuar mbi përvojën e saj gjatë nëntë viteve të fundit në qendër të jetës politike franceze.
“Dikur kisha një jetë normale – fëmijë, punë, ulje-ngritje si të gjithë. Këto vite kaluan shumë shpejt, por ishin jashtëzakonisht intensive. Pashë errësirën e botës, budallallëkun dhe ligësinë,” tha Brigitte Macron.
Ajo pranoi se përvoja në Elize ka ndryshuar ndjeshëm mënyrën si e sheh botën:
“Ka momente kur e kam të vështirë të shoh qiellin blu… kam një lloj pesimizmi që nuk e kisha më parë.”
Ish-mësuesja e frëngjishtes foli gjithashtu për presionin e vazhdueshëm publik dhe sulmet online, duke theksuar se shkrimi i mendimeve të saj ka qenë një mënyrë për të përballuar situatat e vështira.
Në muajin janar, disa persona u dënuan për ngacmim kibernetik ndaj saj, pasi kishin përhapur fyerje dhe teori të rreme, përfshirë pretendime mbi gjininë e saj dhe diferencën në moshë me presidentin. Disa prej tyre u dënuan deri në gjashtë muaj burg, kryesisht me kusht.
Marrëdhënia e çiftit Macron ka qenë shpesh në qendër të spekulimeve dhe dezinformimit, çka i ka detyruar ata të ndjekin rrugë ligjore si në Francë ashtu edhe në SHBA për të mbrojtur reputacionin e tyre.
Ndërsa mandati i dytë i presidentit Macron pritet të përfundojë në vitin 2027, rrëfimi i Brigitte Macron hedh dritë mbi koston personale të jetës në majat e pushtetit – një realitet që shpesh mbetet jashtë vëmendjes publike.
